توقالدار ءوز تاڭداۋىنىڭ دۇرىس نەمەسە بۇرىستىعىن قورىتىندىلادى

استانا. قازاقپارات - قوعامدا توقال ماسەلەسى ايتىلسا بولعانى مۇنى جاقتاۋشىلار مەن داتتاۋشىلار ەكىگە ءبولىنىپ ۇرىساتىن جاعدايعا جەتتى.

ءبىرى مۇنى سالت-داستۇرمەن، دىنمەن بايلانىستىرسا، تاعى ءبىرى مانساپ پەن اقشاعا اكەلىپ تىرەيدى. راسىمەن دە ءارتۇرلى جاستاعى ەكىنشى ايەلدەر ءوز تاڭداۋلارىنا وراي ۋاقىت وتە قانداي باعا بەرەدى ەكەن؟

توقال بولۋعا كونە كەتەتىن قىز-كەلىنشەكتەردى نەگىزىنەن اقشاعا قىزىعىپ، جەڭىل ءومىر سۇرۋگە ادەتتەنگەن ادامدار دەپ قارايتىندار دا كوپ. وسى ورايدا ەكسپرەسسك باسىلىمىنىڭ ءتىلشىسى توقالداردىڭ وزىمەن تىلدەسىپ كورگەن ەدى.

«مەن سۇلۋلىق سالونىندا شاشتاراز بولىپ جۇمىس ىستەيتىنمىن. ارمان ۇنەمى كەلىپ تۇراتىن، ونىمەن سول جەردە ءجۇرىپ تانىستىم. تانىستىعىمىزعا ءبىر اي بولعان كەزدە ەكەۋمىز كەزدەسە باستادىق. ول ءوز ايەلىن ەشقاشان تاستامايتىنىن ايتىپ، ماعان ەكىنشى ايەل بولۋعا ۇسىنىس جاسادى. ارينە، مەنى ماتەريالدىق تۇرعىدان قامتاماسىز ەتۋگە ۋادە بەردى. ونىڭ وتباسى الماتىدا بولدى، ءوزى استانادا جۇمىس ىستەدى. مەن ونىڭ ۇسىنىسىن قابىل الىپ، استاناعا كوشىپ باردىم»، -  دەيدى تومپاقشا كەلگەن ورتا بويلى، قىسقا شاشتى 31 جاستاعى گۇلميرا.

گۇلميرا وسىدان كەيىن ارماننىڭ ءوز وتباسىن استاناعا كوشىرىپ اكەلگەنىن ايتادى. ونىڭ جاسى 49 دا. العاشىندا ءبىرىنشى ايەلى توقال بويىنشا كۇيەۋىنە ەش كۇمان كەلتىرمەگەن. اقىرى بىلگەننەن كەيىن ۇرىس بولىپ، وسى جاعدايعا كونۋگە ءماجبۇر بولىپتى. ال، ارمان مەن گۇلميرانىڭ ورتاق قىزدارى دا بار.

«وسى ءومىرىم وزىمە ۇناي ما، جوق پا وعان جاۋاپ بەرۋ قيىن. ەڭ جامانى سۇيىكتىڭدى باسقا بىرەۋمەن بولىسۋگە ءماجبۇرسىڭ. مەن ۇنەمى جالعىز قالامىن. سەبەبى اتا-انام، تۋىستارىم وسىنداي وتباسىن قۇرۋىما قارسى بولعان ەدى. ولار وسى كۇنگە دەيىن مەنىمەن ارالاسپايدى. ۋاقىتتى ارتقا جىلجىتۋ مۇمكىندىگى بولسا، مەن توقالدىقتى تاڭداماس ەدىم. ءوزىمدى سۇيگەن ادامنىڭ جالعىز سۇيىكتىسى بولۋعا تىرىساتىن ەدىم»، - دەيدى گۇلميرا.

قاراجات ءۇشىن توقال بولعىسى كەلەتىن جاستار قاتارى كۇن ساناپ كوبەيىپ كەلەتىنى جاسىرىن ەمەس. سەبەبى وزدەرى سياقتى قارشاداي قىزدىڭ ەس توقتاتقان ەركەكپەن قوسىلىپ، وڭاي ولجاعا تاپ بولعان مىسالدار كوپ.

 ەكى جىل بۇرىن و ق و- نىڭ اۋىلىنان الماتىعا ءبىلىم ىزدەپ كەلگەن 23 جاستاعى بوتاگوز باي بولۋدى ارماندايدى. قازىر مەديتسينالىق كوللەدجدە ءبىلىم الىپ جۇرگەن ستۋدەنت پاتەر جالداپ تۇرادى. بۇعان قوسا ءۇيدىڭ ۇلكەنى سوڭىنان ەرگەن ءىنىسى مەن سىڭلىسىنە كومەكتەسىپ، ولاردى اياققا تۇرعىزۋى كەرەك. مۇمكىندىك بولسا جاسىنا قاراماي قالتالى ازاماتقا تۇرمىسقا شىعىپ كەتۋگە ءازىر. ءتىپتى قازىر كوڭىل قوسىپ جۇرگەن جىگىتىنەن دە باس تارتۋعا دايىن.

«مەنىڭ جاعدايىمدا قالتالى ازاماتقا ەكىنشى ايەل بولۋ كوپ ماسەلەنى شەشەتىن ەدى. سەبەبى ءومىر بويىنا پاتەر مەن تاماق ءۇشىن جۇمىس ىستەگىم كەلمەيدى. اقشالى ازامات بولسا ول مەنىڭ وتباسىما جۇمىس تاۋىپ بەرىپ كەدەيلىكتەن قۇتقارسا، نەگە ونىمەن ءومىر بويىنا بىرگە بولماسقا؟»، - دەيدى ستۋدەنت بوتاگوز.

34 جاستاعى زاۋرە تۇرمىسقا شىعىپ، ءبىر بالا سۇيگەن. الماتىداعى ساۋدا ۇيلەرىنىڭ بىرىندە ساتۋشى بولىپ جۇمىس ىستەگەن. كۇيەۋى ۇنەمى ءىشىپ وعان قول كوتەرىپ، تىنىشىن قاشىرىپتى. مۇندايعا شىداماعان كەلىنشەك كۇيەۋىمەن اجىراسۋعا بەل بۋعان.

«مەن ءبىراز ۋاقىت ەركەكسىز ءجۇردىم. سوسىن وزىمنەن 18 جاس ۇلكەن ايدوس دەگەن ازاماتپەن عالامتورداعى تانىسۋ سايتىندا تانىستىم. جارتى جىلداي سويلەسىپ جۇردىك. ونىڭ كولىك جوندەيتىن ورتالىعى مەن ەكى اسحاناسى بولدى.  ۇلىمدى كوللەدجگە وقۋعا ءتۇسىرىپ، وزىمە كاسىپ اشىپ بەردى. سودان ول ماعان ەكىنشى ايەلى بولۋعا ۇسىنىس جاسادى. ول ءبىرىنشى ايەلىمەن اجىراسار دەگەن ۇمىتپەن ونىڭ ۇسىنىسىن قابىل الدىم. قازىر ويلاپ وتىرسام، قاتەلەسىپپىن. راسىمەن دە مەن ءوزىمدى سىيلامايتىن اداممىن. باسىندا ايەلىنىڭ بارىن ءبىلىپ تۇرىپ، ونىمەن قارىم قاتىناس قۇردىم»، -  دەيدى زاۋرە.

زاۋرە تۇرمىسقا شىققانىمەن ايدوستىڭ ءبىرىنشى وتباسى بۇدان بەيحابار. ال، زاۋرەنىڭ تۋىستارى ونى بويداق جىگىتپەن باس قوستى دەپ ويلايدى ەكەن. ەسەسىنە قازىر زاۋرەنىڭ ءوز ءۇيى، كاسىبى، كولىگى بار ەكەن. دەگەنمەن ايدوستىڭ ايەلى زاۋرە جايلى ءبىلىپتى. ءبىراق ەشقاشان ءتىپتى تەلەفونمەن سويلەسپەگەن كورىنەدى.

«ايدوس ءبىر اي مەنىمەن، ءبىر اي ءبىرىنشى ايەلىمەن تۇراتىن. ونىڭ توقالى بار دوستارىمەن مەيرامحانا دەيسىز بە كوپتەگەن كوڭىلدى كەشتەرگە بىرگە باراتىنبىز. ال قوعامدا مەن ايدوستىڭ كولەڭكەسى، ەلەۋسىز بىرەۋ بولىپ قالاتىنمىن. مىسالى ونىڭ دوستارى ءوز ايەلدەرىمەن كەلسە مەن جوق ادام سياقتى، ول ورتادا ەشكىمدى تانىمايتىنداي تۇرۋىم كەرەك بولدى»، - دەيدى زاۋرە.

بىردە زاۋرە توقالدىق جايلى وقىپ ءوز وزىنەن قاتتى ۇيالعانىن جاسىرمايدى. سەبەبى وندا قازاقتا ماحاببات بويىنشا ەكىنشى ايەلگە ۇيلەنۋ بولعان كۇننىڭ وزىندە، بايبىشەنىڭ رۇقساتىمەن جۇزەگە اسىرىلعانى ايتىلعان. شاريعات زاڭى بويىنشا دا وسى قاعيدا ەدى.

كوپ جىل ايەلى بار ەركەكپەن جاسىرىن كەزدەسۋدەن كەيىن، ءارى قاراي ارى جىبەرمەگەن زاۋرە ايدوسپەن قارىم-قاتىناستى ۇزۋگە بەل بۋعان. ول الداعى ۋاقىتتا باسى بوس، ءوزىن سۇيەتىن ەر ادامدى كەزدەستىرەتىنىنە سەنىمدى.

 

دەرەككوز: Stan.kz