بەس ءتىل بىلەتىن جاس مامان جاستارعا ءتىل ۇيرەتۋدى وزىنە ماقسات تۇتقان
جاس مامان كوپتەگەن شەتەلدىك كومپانيالار قىزمەتكە شاقىرسا دا بارماي، جاستارعا ءتىل ۇيرەتۋدى وزىنە ماقسات تۇتقان، دەپ جازادى «ايقىن» گازەتى.
«جەر بەتىندەگى 2 ميللياردقا جۋىق ادام اعىلشىن تىلىندە سويلەسە، جىلىنا 55 مىڭنان استام پايدالى ادەبيەتتەر شىعادى ەكەن.
ال نەگىزگى عىلىمي كىتاپتاردىڭ 33 پايىزى اعىلشىن تىلىنە مىندەتتى تۇردە اۋدارىلادى. وسىدان- اق، اعىلشىن ءتىلىن بىلەتىن ادامنىڭ اسىعى الشىسىنان تۇسەتىنىن پايىمداي بەرۋگە بولادى. بۇگىندە ەلىمىزدە شەتەلدەن ىزدەگەنى - ءىلىم، كوزدەگەنى ءبىلىم بولعان جاستاردىڭ قاتارى ارتىپ كەلەدى»، دەلىنگەن ماقالادى.
ولاردىڭ تۇگەلى دەرلىك اعىلشىن ءتىلىن مەڭگەرىپ، تەڭ جارتىسى قوسىمشا ءتىل ۇيرەنۋدە. سونداي جاستاردىڭ ءبىرى اسەم تانىسبەكوۆا «اعىلشىن ءتىلى - الەمدەگى كوپ تارالعان ءتىل. جاستار ەلىمىزدىڭ سىرتقى ساياساتى مەن ەكونوميكاسىن دامىتۋ ماقساتىندا مەيلىنشە، ءتىل ۇيرەنگەنى دۇرىس. ال قازاق، ورىس، اعىلشىن ءتىلىن جەتىك مەڭگەرگەنى ابزال» دەيدى. تەك اعىلشىن ءتىلىن ءبىلۋ ارقىلى الەمدەگى 2 ميللياردقا جۋىق اداممەن ەركىن كوممۋنيكاتسيا جاساۋعا جول اشىلادى. بيزنەس، تۋريزم، عىلىم، ءبىلىم بەرۋ جۇيەسى، ينتەرنەت، كينەموتوگرافيا جانە تاعى باسقا الەمنىڭ ءتۇرلى سالاسىندا اعىلشىن ءتىلى قولدانىلىپ، كوپتەگەن الەمدىك جوبالار، ساياسي كەزدەسۋلەر مەن جيىندار، سپورتتىق جارىستار مەن وليمپيادالار اعىلشىن ءتىلىنسىز وتپەيتىنى جاسىرىن ەمەس.
2010 -جىلى ابىلاي حان اتىنداعى حالىقارالىق قاتىناستار جانە الەم تىلدەرى ۋنيۆەرسيتەتىنىڭ شەت ءتىلى فيلولوگياسى ماماندىعىنا ءتۇسىپ، پولياك ءتىلىن مەڭگەرگەن اسەم پولشا مەملەكەتى كونسۋلدىعى ۇيىمداستىرعان Jaka jest piekna Warszawa w lipcu (« شىلدەدەگى ۆارشاۆانىڭ اسەمدىگى») باعدارلاماسى بويىنشا 3 اپتالىق جولداما الادى. كەيىننەن وسى وكىلدىك ۇيىمداستىرعان Jezyk i kultura Polski («پولشانىڭ ءتىلى مەن مادەنيەتى») باعدارلاماسىمەن ۆارشاۆا قالاسىنا 6-ايلىق وقۋعا كەتەدى. بۇدان بولەك، اسەم ۋنيۆەرسيتەت قابىرعاسىندا ءجۇرىپ قوسىمشا يسپان ءتىلىن ۇيرەنەدى.
وقۋىن ءتامامداپ، ەلگە كەلگەننەن كەيىن پولشا مەملەكەتتىك زاڭ فيرماسىنىڭ ەلىمىزدەگى بولىمشەسىندە اۋدارماشى بولىپ قىزمەت اتقارادى. ۋاقىت وتە ەلىمىزدىڭ جاستارىنا شەتەلدەن العان ءبىلىمىن ۇيرەتۋ ارقىلى، قازاققا پايداسىن تيگىزۋدى ويلاعان اسەم ءۇش جىلدان بەرى ءتىل ۇيرەتەتىن «مەجدۋنارودنيك» مەكتەبىندە پولياك تىلىنەن ساباق بەرەدى. «جاستاردىڭ ءتىل بىلۋگە دەگەن ۇمتىلىسى جوعارى. پولياك ءتىلىن ۇيرەنۋگە كەلگەن بالالاردىڭ ءتىل مەڭگەرۋگە قابىلەتى، بەيىمى بار. وقۋشىعا ەرتە جاستان ءتىل ۇيرەتكەننىڭ پايداسى زور. جاراتىلىس تانۋ جانە گۋمانيتارلىق پاندەردى بىردەن اعىلشىن تىلىندە وقىتۋ قيىندىق تۋدىرۋى مۇمكىن. دەگەنمەن، قازاق بالالارى تىلدەردى مەڭگەرۋدە جوعارى كورسەتكىشكە يە» دەيدى پەداگوگ- مامان.
بۇگىندە قازاق تىلىنەن بولەك، ورىس، اعىلشىن، پولياك جانە يسپان تىلدەرىن ەركىن مەڭگەرگەن جاس مامان كوپتەگەن شەتەلدىك كومپانيالار قىزمەتكە شاقىرسا دا، جاستارعا ءتىل ۇيرەتۋدى وزىنە ماقسات تۇتقان. «ارمانىم - بىرنەشە ءتىل بىلەتىن، ساۋاتتى جاستاردىڭ قاتارىن كوبەيتۋ» دەيدى اسەم تانىسبەكوۆا.
اسىل تۇمار
