ماگنيتتى ويىنشىقتار سابيلەردىڭ ومىرىنە قاۋىپتى

استانا. قازاقپارات - سوڭعى كەزدە ويناپ وتىرعان بالانى وپەراتسيا ۇستەلىنەن ءبىر-اق شىعاراتىن ماگنيتتى ويىنشىقتار پايدا بولدى.

قاۋىپتىسى سول، ويىن بالاسى ۇساق بولشەكتەردى جۇتىپ قويسا، ونىڭ وزدىگىنەن شىعا قويۋى ەكىتالاي. ماگنيت اتىلعان وقتاي اس قورىتۋ ورگاندارىن زاقىمداپ وتەدى.

ءبۇلدىرشىن ءبىر ەمەس، بىرنەشە ماگنيت جۇتسا، ولار تابيعي جولمەن جىلجۋدىڭ ورنىنا تارتىلىپ، ىشەكتەر مەن اسقازاندى ءبىر- بىرىنە قابىستىرىپ تاستايدى. بىرەر كۇندە ەم جاسالماسا، قاۋىپتى تەمىر جابىسقان جەرىن تەسىپ وتەدى.

«اتا- اناسى بىلمەگەننەن كەيىن بالا جۇرە بەرەدى. بالا اۋىرعاندا عانا شاعىمدانادى. سول كەزدە اۋرۋحاناعا اكەلەدى. ءبىراق ول كەزدە ۋاقىت ءوتىپ كەتەدى. ىشەك تەسىلىپ، اسقازان- ىشەك جولدارى ءىرىڭدى پەريتونيتكە اينالىپ كەتۋى مۇمكىن. سوندىقتان مۇنداي نارسەنى بالانىڭ ويىنشىعىنا قوسۋعا بولمايدى، قولىنا دا بەرۋگە بولمايدى»، - دەيدى №2 بالالار اۋرۋحاناسى جالپى حيرۋرگيا بولىمشەسىنىڭ اعا حيرۋرگى جۇماتاي ماكەنوۆ.

ءبىر جاسار ارۋنا №2 بالالار اۋرۋحاناسىنا كەشە تۇندە جەتكىزىلدى. ويناپ وتىرىپ 2 ماگنيتتى جۇتىپ قويعان. ابىروي بولعاندا، اناسى بىردەن كومەككە جۇگىنگەن. اتا- انانىڭ دەگبىرىن قاشىرىپ، دارىگەرلەردى وڭايلىقپەن تاپتىرماي، سارساڭعا سالعان قاۋىپتى ويىنشىق نەوكۋب دەپ اتالادى. شەتەلدە 10 جاستان اسقان ەستى بالالاردىڭ زەردەسىن وياتىپ، ويلاۋ قابىلەتىن دامىتۋعا ارنالعان. ال قازاقستاندا نەوكۋبتى 3 جاستان اسقان بوبەكتەرگە ساتۋعا جول بەرىلگەن. اتا-انالار مەن دارىگەرلەر شاعىم كوبەيگەن سوڭ، زياندى ويىنشىق ساتىلمايتىن بولعان. كەڭسە تاۋارلارىن ساتاتىن دۇكەندەردىڭ ەشقايسىنان تابىلمادى. تەك تاپسىرىپ بەرىپ، ينتەرنەت ارقىلى الۋعا بولادى. وكىنىشتىسى، ۋلى زات بولەتىن ماگنيت، باتارەيا سىندى تەمىر-تەرسەكتەن قازاقستاندا ونداعان بالا پىشاققا ءتۇسىپ، جاس اعزاسىنا جازىلماس جارا قالدىردى، دەپ جازادى 24.kz.