الماتىدا شىعىس ويشىلى ءجۇسىپ بالاساعۇن شىعارماشىلىعىنا ارنالعان عىلىمي كونفەرەنتسيا ءوتتى
مادەني شارا III حالىقارالىق فارابي وقۋلارى اياسىندا ق ر تاۋەلسىزدىگىنىڭ 25 جىلدىعى، يۋنەسكو اياسىنداعى ياسساۋي جىلى جانە تۇركسوي جاريالاعان ءجۇسىپ بالاساعۇن جىلىنا وراي ۇيىمداستىرىلدى.
ۇيىمداستىرۋشىلاردىڭ ايتۋىنشا، زاماناۋي تۇرعىدان ۇلى ويشىلدىڭ شىعارماشىلىق مۇراسىن تاراتۋ، سان عاسىرلاردان كەلە جاتقان ۇلتتىق مۇرالارىمىزدىڭ ماڭىزدىلىعىن تۇسىندىرە وتىرىپ، ءتۇبى ءبىر تۇركى ەلدەرى اراسىنداعى ورتاق قۇندىلىقتاردى ايقىنداۋ، بايىتۋ، ورىستەتۋ جانە ىلگەرىلەتۋگە جانە تۇركى الەمىندەگى مادەني قاتىناستاردى تەرەڭدەتۋ باستى ماقسات بولىپ وتىر.
«بيىل بارلىق تۇركى الەمىنىڭ ماقتانىشى، ۇلى عالىم ءجۇسىپ بالاساعۇننىڭ تۋعانىنا 1000 جىل تولدى. بيىل يۋنەسكو تاعى ءبىر شىعىس ويشىلى قوجا احمەتتىڭ ياسساۋي جىلى دەپ جاريالادى. بۇل ادامزاتتى بىرىكتىرەتىن جوبالار دەپ سانايمىن. ەكەۋى دە تۇركى الەمىنىڭ دامۋىنا ۇلكەن ۇلەس قوسقان عالىمدار.
ءجۇسىپ بالاساعۇننىڭ شىعارماشىلىق مۇرالارى ءتىل، ادەبيەت، زاڭ، مەملەكەتتىك باسقارۋ، ءپالساپا، باسقا عىلىم سالالارىن قامتيدى. ونىڭ «قۇتتى بىلىك» پوەماسى - كوركەم ادەبيەتتىڭ عاجايىپ تۋىندىسى. ونىڭ وعىز-قىپشاق تىلىندە جازىلعان «قۇتادعۋ بىلىگى» الەمنىڭ 100 دەن استام تىلىنە اۋدارىلىپ، قاراحانيدتەر داۋىرىندەگى تۇركى حالقىنىڭ فيلوسوفياسى بويىنشا باستى دەرەك كوزى بولىپ تابىلادى. بۇگىنگى كونفەرەنتسيا وسى مۇرالاردى تەرەڭىنەن زەرتتەپ، جاڭا، تىڭ دەرەكتەردى اشۋعا سەپتىگىن تيگىزەدى دەپ ويلايمىن»، - دەدى قاز ۇ ۋ رەكتورى عالىمقايىر مۇتانوۆ.
جيىنعا حالىقارالىق تۇركسوي ۇيىمىنىڭ باس حاتشىسى دۇيسەن قاسەيىنوۆ، تۇركى تىلدەس ەلدەرىنىڭ الماتىداعى ديپلوماتيالىق قىزمەتكەرلەرى، ءجۇسىپ بالاساعۇننىڭ شىعارماشىلىعىمەن اينالىساتىن تۇركيا، ءازىربايجان، باشقۇرتستان، قىرعىزستاننان شەتەلدىك عالىمدار، سونداي-اق قازاقستاننىڭ عالىمدارى، دوكتورانتتار، ماگيسترانتتار، ستۋدەنتتەر قاتىستى.
اۆتور: گۇلميرا عوسمانالي
