ءوز ءىسىن ونەر دەپ تانىعان فوتو ءتىلشى عانا گازەتتىڭ مارتەبەسىن كوتەرە الادى - ن. قيزات ۇلى

الماتى. قازاقپارات- ءوز ءىسىن شىن سۇيەتىن جانە ونى ونەر دەپ تانىعان فوتو ءتىلشى عانا گازەتتىڭ مارتەبەسىن كوتەرە الادى.

الماتىدا قولعا الىنعان «تاۋەلسىزدىك تاعىلىمى» اتتى ۇلتتىق جوبا اياسىندا «قازاقپارات» تىلشىسىنە بەرگەن سۇحباتىندا فوتوجۋرناليستيكا سالاسىندا 45 جىل ەڭبەك ەتكەن، سونىڭ ىشىندە 40 جىل ءومىرىن «جەتىسۋ» گازەتىنە ارناعان، ال بۇگىندە 75 جاسقا اياق باسقان بەلگىلى ارداگەر فوتو ءتىلشى نۇرمانبەت قيزات ۇلى وسىلاي دەدى.

ونىڭ ايتۋىنشا، قازىرگى تاڭدا گازەت بەتتەرىنە جاريالانعان فوتوسۋرەتتەردىڭ ساپاسى سىن كوتەرە بەرمەيدى.

«مەن قازىر كەيبىر گازەت بەتتەرىنەن جوعارى دەڭگەيدە تۇسىرىلگەن دۇنيەلەردى كورە الماي ءجۇرمىن. سىن جوق جەردە ساپا دا جوق. ءبىر بەتكە تاباقتاي ەتىپ، ءبىر سۋرەتتى قويا سالادى»، - دەدى ن. قيزات ۇلى.

سونىمەن قاتار، نۇرمانبەت اعا كەڭەس زامانىندا قازاق گازەتتەرىندە فوتوتىلشىلەرگە قويىلاتىن تالاپ وتە اۋىر بولعاندىعىن ەسىنە الدى.

«مەن ءۇش رەداكتورمەن جۇمىس ىستەپپىن. ۇلكەن ءومىر مەكتەبىنەن ءوتتىم. گازەتتە جاۋاپتى حاتشىلىق دەگەن بولادى. سوندا، ءتۇسىرىپ كەلگەن 15-20 شاقتى سۋرەتىڭنىڭ بىرەۋىن عانا قالدىرىپ، قالعاندارىن لاقتىرىپ تاستاپ، ءيت- تەرىڭدى باسىڭا قاپتاپ ۇرىسقان كەزدەر دە بولدى عوي. سوندا «سۋرەتىم كارزەڭكەگە كەتىپ قالماسىنشى» دەپ، قالاي تۇسىرەتىنىڭدى الدىن الا ىشتەي ويلاپ، ۇنەمى پىسىقتاپ جۇرەتىنبىز. تۋرا ءبىر جانكەشتى جۇمىستى اتقارىپ جۇرگەن جاۋىنگەر سەكىلدى ەدىك. ءيا، سۋرەت ءماتىن ەمەس، وزگەرتە سالاتىن. ول - قاس- قاعىم ءسات. سول ءۇشىن كەيدە جەر جىرتىپ جاتقان تراكتورشىلاردى تۇسىرەم دەپ، ايدالعان جەرمەن ءجۇرىپ، ءۇستى- باسىمىز شاڭ، باتپاق بولىپ كەتەتىن كەزدەرىمىز بولدى. شاڭ كەتەدى عوي، ال ۇتىمدى، ۇيلەسىمدى، سىرعا تولى قاس- قاعىم ساتتەر قايتىپ ورالمايدى»، - دەدى ن. قيزات ۇلى.

ءسوز سوڭىندا ارداگەر فوتو ءتىلشى بۇگىنگى فوتوتىلشىلەردى ءوز جۇمىسىن تەك كۇنكورىس قامى دەپ قاراماۋعا شاقىردى.

«ءوز ماماندىعىڭدى ءسۇيۋ كەرەك. ول ءۇشىن ەشقانداي قيىندىقتان قاشپا! سۋرەتتە قاس- قاعىم ءسات بەينەلەگەنىمەن ونىڭ سىرى تەرەڭدە. سۋرەت «سىرلاسىپ» تۇرماسا ول سۋرەت ەمەس. ول سىر، قاس- قاعىم ساتپەن كەلەدى. ونى جىبەرىپ الماۋ كەرەك. جىبەرىپ الساڭ، وكىنىشى اۋىر بولادى. وسى ونەردىڭ ىستىق- سۋىعىنا شىداعان، شارشاۋ بىلمەيتىن سۋرەتشىلەر عانا كورمەلەردىڭ تورىنەن ورىن الادى»، - دەدى ن. قيزات ۇلى.

ايتا كەتەلىك، كەشە ق ر ۇلتتىق كىتاپحاناسىندا «تاۋەلسىزدىك تاعىلىمى» اتتى ۇلتتىق جوبا اياسىندا «ەل ماقتانىشتارى» اتتى فوتوكورمە اشىلدى. ەندى، ول الداعى 28 -ساۋىردە استانا قالاسىندا جالعاسىن تابادى.

اۆتور: ايبوتا جاپپاربەرگەن