قىتاي ساراپشىلارى ن. نازاربايەۆتىڭ انتي يادرولىق باستامالارىن جوعارى باعالاۋدا
مۇنداي پىكىردى قازاقستاندىق جۋرناليستەرگە سۇحبات بەرگەن ق ح ر مەملەكەتتىك كەڭەسى جانىنداعى دامۋ ماسەلەلەرى جونىندەگى زەرتتەۋ ورتالىعى قوعامدىق دامۋدى زەرتتەۋ ينستيتۋتىنىڭ پروفەسسورى ۋاڭ چيانجۇي (Wang Xianju) ءبىلدىردى.
«نۇرسۇلتان نازاربايەۆتىڭ ماڭىزدى باستامالارىنىڭ ب ۇ ۇ تارابىنان كەڭىنەن قولداۋ تابۋى جانە اتالعان حالىقارالىق ۇيىمنىڭ رەسمي قۇجاتى مارتەبەسىن الۋى كوتەرىلىپ وتىرعان پروبلەمانىڭ وزەكتىلىگىن بەكىتە تۇسەدى. ءوز تارابىمنان قىتايدىڭ عىلىمي قاۋىمداستىعى قازاقستان كوشباسشىسىنىڭ باستاماسىن قولدايتىندىعىن اتاپ وتكىم كەلەدى»، - دەدى ول.
قىتاي ساراپشىسى جاھاندىق قاۋىپسىزدىكتى قامتاماسىز ەتۋدەگى قازاقستاننىڭ باستى ۇلەسى الەمدەگى قۋاتى جاعىنان ءتورتىنشى يادرولىق قارۋدان باس تارتۋى جانە سەمەي يادرولىق پوليگونىن جابۋى ەكەندىگىن باسا ايتتى.
«قازاقستان بۇل باعىتقا باسا كۇش- جىگەر جۇمساۋىن جالعاستىرۋدا جانە يادرولىق تاراتپاۋ ىسىنە، تولىقتاي العاندا ءبىزدىڭ عالامشارىمىزداعى بەيبىتشىلىكتى قامتاماسىز ەتۋگەزور ۇلەس قوسۋدا. قازاقستان پرەزيدەنتى وتكەن سامميت بارىسىندا يادرولىق قاۋىپسىزدىك جونىندەگى كەلەسى ءسامميتتى قازاقستاندا وتكىزۋدى ۇسىندى. مەنىڭشە، بۇل وتە جاقسى ۇسىنىس. ول قازاقستاننىڭ بۇل ماسەلەگە مۇنان دا ايرىقشا ءمان بەرۋىن جالعاستىرا تۇسەتىندىگىن دالەلدەيدى»، - دەدى ول.
ۋاڭ چيانجۇي قازاقستاندا ماگاتە- مەن بىرلەسىپ تومەن بايىتىلعان وتىن بانكىن قۇرعانىن، سونىمەن بىرگە سامميت بارىسىندا قازاقستان مەن ا ق ش- تىڭ يادرولىق قاۋىپسىزدىك جانە تاراتپاۋ سالاسىنداعى ىنتىماقتاستىق تۋرالى بىرلەسكەن مالىمدەمە قابىلداعانىن اتاپ ءوتتى. سونىمەن قاتار ول چەرنوبىل ا ە س- ىندە بولعان اپاتتى دا ەسكە سالىپ ءوتتى.
«1986 -جىلعى چەرنوبىل اپاتىن ءوز كوزىممەن كوردىم دەسەم دە بولادى. وتە كوپ ادام زارداپ شەكتى. يادرولىق قاۋىپسىزدىكتى قامتاماسىز ەتۋ - بۇل ءبىر مەملەكەتتىڭ ەمەس، بۇكىل الەمدىك قوعامداستىقتىڭ ماسەلەسى»، - دەپ تۇيىندەدى ءسوزىن ول.
اۆتور: مارلان جيەمباي
