ماعجان اۋەزوۆ قازاقستان قارجىگەرلەر قاۋىمداستىعى كەڭەسىنىڭ ءتوراعاسى بولىپ سايلاندى
اتالعان لاۋازىمعا «كازكوممەرسبانك» ا ق باسقارما ءتوراعاسى ماعجان اۋەزوۆ لايىق دەپ تانىلدى.
«قاۋىمداستىق مۇشەلەرى كەڭەستىڭ بۇرىنعى ءتوراعاسى اسقار ەلەمەسوۆتىڭ ءوز ەركىمەن كەتۋىن قولداپ، جاڭا باسشىنى قابىلدادى. ماعجان مۇرات ۇلى ەندى 2016 -جىلدىڭ 15 -ساۋىرىنەن ءوز مىندەتىنە كىرىسەدى»، - دەلىنگەن حابارلامادا.
وتىرىس بارىسىندا جينالعاندار اسقار ەلەمەسوۆكە مەملەكەت پەن قارجى سەكتورى اراسىنداعى ىقپالداستىقتى نىعايتۋعا قوسقان ۇلەسى مەن اتقارعان جۇمىسى ءۇشىن العىس ءبىلدىردى.
ال، قازاقستان قارجىگەرلەر قاۋىمداستىعىنىڭ ءتوراعاسى سەرىك احانوۆ ءوزىنىڭ جۇمىسىن ودان ءارى جالعاستىراتىن بولدى.
ۇيىم جارعىسىنا سايكەس قاۋىمداستىق كەڭەسىنىڭ ءتوراعاسى ماعجان اۋەزوۆكە ەكى اي ىشىندە قاۋىمداستىقتىڭ جۇمىسىن جاڭعىرتۋدىڭ جاڭا باعدارلاماسىن جاساۋ تاپسىرىلدى.
«اتامەكەن» ۇلتتىق كاسىپكەرلەر پالاتاسى بۇل شەشىمدى تولىعىمەن قۇپتايدى. ناقتى سەكتور ءۇشىن ارزان ءارى ۇزاق مەرزىمدى نەسيەگە قول جەتكىزۋ وتە وزەكتى. ونىڭ باسقارۋى ناتيجەسىندە بەدەلدى ساراپشىلار الاڭى دارەجەسىنە جەتىپ وتىرعان قاۋىمداستىق ۇلتتىق بانكپەن دە، كاسىپكەرلەر پالاتاسىمەن دە سەنىمدى سەرىكتەستىك ورناتادى دەگەن ۇمىتتەمىز»، - دەدى ۇ ك پ باسقارما ءتووراعاسىنىڭ ورىنباسارى ابىلاي مىرزاحمەتوۆ.
ايتا كەتۋ كەرەك، قازاقستان قارجىگەرلەر قاۋىمداستىعىنا 184 قارجى ۇيىمى ەنگەن. ولاردىڭ ىشىندە بانكتەر، ساقتاندىرۋ ۇيىمدارى، قۇندى قاعازدار نارىعىنىڭ قاتىسۋشىلارى، ليزينگتىك كومپانيالار، اۋديتورلىق، كونسالتينگتىك كومپانيالار بار.
اۆتور: گۇلميرا عوسمان-ءالي
