ۇلى بريتانيادا تيتانيكتەن جازىلعان ءبىرىنشى حات اۋكسيونعا قويىلدى

استانا. قازاقپارات - ۇلى بريتانيادا «تيتانيكتە» جازىلعان جانە كەمەنىڭ ءبىرىنشى جانە سوڭعى ساياحاتقا اتتانۋعا بىرنەشە ساعات قالعاندا جىبەرىلگەن العاشقى حات اۋكسيونعا قويىلماق.

حاتتى 1912 -جىلى 10 -ساۋىردە پول دەنبي سول كەزدە مانچەستەردە تۇرىپ جاتقان ايەلى روۋزگە جازعان. بۇل كۇنى «تيتانيك» ساۋتگەمپتوننان نيۋ-يورككە اتتاندى، ال حات اۆتورى ايەلىنىڭ اعاسىن، ۇلى بريتانيالىق پارفيۋمەر ادولف زاالفەلدتى شىعارىپ سالعان، دەپ جازدى informing.ru.

«قىمباتتىم گولل (گولل - پول دەنبي ايەلىن وسىلاي اتاعان، رەد. )»، - دەپ جازدى دەنبي. - «ءبىز بۇل كەمەدەن حات جازىپ جاتقان العاشقىلاردىڭ ءبىرىمىز».

سونداي- اق پول ءوز حاتىندا اعاسىنىڭ كايۋتاسىن سيپاتتاپ، ونىڭ كەڭ، قوناق ۇيدەگى نومەر سياقتى ەكەنىن، ىڭعايلى ديۆان مەن ەلەكتر جەلدەتكىشى بار ەكەنىن جازدى.

اتاپ وتەيىك، حات «تيتانيكتىڭ» فيرمالىق بلانكىندە نەمىس تىلىندە جازىلعان. ول ازىرگە 21 مىڭ دوللارعا باعالانىپ وتىر.