وڭتۇستىك كورەيا بيزنەسى قازاقستاننىڭ جەكەشەلەندىرىلەتىن نىساندارىنا قاتىسۋعا قىزىعۋشىلىق تانىتادى

استانا. قازاقپارات - وڭتۇستىك كورەيا بيزنەسى قازاقستاننىڭ جەكەشەلەندىرىلەتىن نىساندارىنا قاتىسۋعا قىزىعۋشىلىق تانىتادى. بۇل تۋرالى «اتامەكەن» ۇلتتىق كاسىپكەرلەر پالاتاسى باسقارما ءتوراعاسىنىڭ ورىنباسارى يۋليا ياكۋپبايەۆانىڭ وڭتۇستىك كورەيادان كەلگەن بيزنەس-دەلەگاتسيانى قابىلداۋى بارىسىندا ءمالىم بولدى.

كەزدەسۋدىڭ ماقساتى قازاقستاندىق نىسانداردى جەكەشەلەندىرۋدىڭ بارىسىنا كورەيالىق تاراپتىڭ قاتىسۋ پەرسپەكتيۆالارىن تالقىلاۋ بولاتىن. ال دەلەگاتسيانىڭ باسىم بولىگىن كورەيانىڭ اسا ءىرى بانكتەرىنىڭ ءبىرى «Kookmin Bank» قارجىلىق توبىنىڭ وكىلدەرى قۇراپ وتىر. وسىعان بايلانىستى، شاراعا نىساندارى ساۋداعا شىعارىلاتىن مينيسترلىكتەر مەن ۆەدومستۆولاردىڭ دەپارتامەنت باسشىلارى، ۇلتتىق حولدينگ وكىلدەرى شاقىرىلدى.

ءوز كەزەگىندە يۋليا ياكۋپبايەۆا قازاقستانداعى جەكەشەلەندىرۋ ۇدەرىسى اسا بەلسەندى تۇردە ءوتىپ جاتقانىن، ساتۋعا قويىلاتىن اكتيۆتەر ءتىزىمى ايقىندالعانىن اتاپ ءوتتى. ونىڭ ايتۋىنشا، ساۋدا-ساتتىقتىڭ ءىرى لوتتارى بويىنشا جوبالىق-كەڭسەلەر قۇرىلعان. قور بيرجاسى مەن كاسىپكەرلەر پالاتاسىنىڭ وكىلدەرى اتالعان جوبالىق-كەڭسەلەر قۇرامىنا ەنىپ وتىر.

«قازىرگى كۇنى ءبىزدىڭ جەكە بيزنەسپەن، باعالى قاعازدار نارىعى وكىلدەرىمەن ىنتىماقتاستىق ايامىز كەڭەيىپ كەلەدى»، - دەدى «اتەكەمەن» وكىلى.

كەزدەسۋ بارىسىندا كورەيالىق بيزنەس-دەلەگاتسيا وزدەرىنە قىزىعۋشىلىق تۋدىراتىن سۇراقتارعا قۇزىرلى ورگانداردان تىكەلەي جاۋاپتار الدى. قوناقتاردى اسىرەسە شەتەلدىك ينۆەستورلاردى قورعاۋعا جانە ىنتالاندىرۋعا باعىتتالعان قازاقستان ۇكىمەتىنىڭ قابىلداپ جاتقان شارالارى قىزىقتىرعانى بەلگىلى بولدى. بۇدان بولەك، كورەيالىق بيزنەس جەكەشەلەندىرۋگە قاتىسۋ تالاپتارى، جەكەشەلەندىرۋگە جاتاتىن اكتيۆتەرگە اۋديت جۇرگىزۋ ءتارتىبى تۋرالى جان-جاقتى ماعلۇمات الدى.

اۆتور: قانات مامەتقازى ۇلى