قىتايدىڭ ەكونوميكالىق قۇرىلىمىنداعى وزگەرىستەر قازاقستانعا دا اسەر ەتەدى
بەلگىلى بولعانىنداي، 2015-جىلى قازاقستاندىق ەكسپورتتىڭ 12 پايىزى، ال يمپورتتىڭ 17 پايىزى قىتايدىڭ ۇلەسىنە تيگەن ەكەن. بۇل تۋرالى پالاتانىڭ باسپا ءسوز قىزمەتىنەن حابارلاندى.
«ناۋرىز ايىنداعى ازيا دامۋ بانكىنىڭ بايانداماسىنا سايكەس، 2016-جىلى قىتاي ەكونوميكاسىنىڭ ءوسىمى 6,5 پايىز، 2017-جىلى 6,3 پايىزدى قۇرايدى. بۇل رەتتە ا د ب ساراپشىلارى قىتاي ەكونوميكاسىنىڭ باسەڭدەۋىنە سەبەپ رەتىندە جۇمىسقا قابىلەتتى ەل حالقىنىڭ ازايۋىن، ەكونوميكالىق ءوسىم مودەلىنىڭ ەكسپورت پەن ينۆەستيتسياعا ەمەس تۇتىنۋشىلىققا نەگىزدەلگەن قۇرىلىمدىق وزگەرىسىن اتاپ وتىر. ادب ەسەبىنشە، قىتايدىڭ مۇنداي قۇرىلىمدىق وزگەرىستەر قادامى ازيانىڭ دامۋشى ەلدەرى ءۇشىن زور قاتەر»، - دەلىنگەن باسپا ءسوز تالداۋدا.
پالاتا ساراپشىلارىنىڭ پايىمىنشا، قىتاي ەكونوميكاسى پروبلەمالارىنىڭ قازاقستانعا دا اسەرى بار. «قىتاي اۋقىمى جاعىنان قازاقستان ءۇشىن ەكىنشى ورىندا تۇرعان ساۋدالىق ارىپتەس ەل. 2015-جىلى قازاقستاندىق ەكسپورتتىڭ 12 پايىزى جانە يمپورتتىڭ 17 پايىزى قىتايدىڭ ۇلەسىنە ءتيدى. بۇل ۇلەس 2014-جىلدان بەرى تومەندەپ وتىر»، - دەلىنگەن تالداۋدا.
تۇتاستاي العاندا، قازاقستاننىڭ قىتايمەن ساۋدا قۇرىلىمى سارالانۋدىڭ تومەن دەڭگەيىمەن ەرەكشەلەنەدى. سوسىن قىتايعا ەكسپورتتىق تاۋارلار قۇرىلىمىندا شيكىزات رەسۋرستارى باسىمدىققا يە. الايدا، قىتاي تاراپىنان سۇرانىستىڭ تومەندەۋى قازاقستاندىق ەكسپورت قۇرىلىمىنا دا اسەر ەتكەن. ال قىتايدان جەتكىزىلەتىن يمپورتتىڭ نەگىزى ماشينا، قۇرىلعىلار، مەتاللۋرگيا مەن حيميا جانە جەڭىل ونەركاسىپ ونىمدەرىن قۇرايدى. جيىنتىعىندا ءدال وسى تاۋارلار پوزيتسياسى قىتايدىڭ قازاقستانعا جاساعان يمپورتىنىڭ 60 پايىزىنا تەڭ بولىپ وتىر.
«شەتەلدىك تىكەلەي ينۆەستيتسيانىڭ جالپى اعىنى دا ساۋدا-ەكونوميكالىق ىنتىماقتاستىق سەرپىنىنە كورىنىس بەرەدى. سوڭعى جىلدارى قىتايدان كەلەتىن شەتەلدىك تىكەلەي ينۆەستيتسيا قازاقستانعا تارتىلعان جيىنتىق ينۆەستيتسيانىڭ ورتاشا العاندا 7-8 پايىزىنا تەڭ بولىپ وتىر. الايدا، 2013-جىلدان باستاپ، قىتايدان قازاقستانعا تارتىلعان ينۆەستيتسيالار كولەمى قىسقارا باستادى»، - دەلىنگەن باسپا ءسوز بايانىندا.
اۆتور: قانات مامەتقازى ۇلى
