ءيتتى ەمگەن قوزىنىڭ ەتى ادال ما؟
ءبىرى ءيتتى ارام دەدى، ەكىنشىسى ادال دەدى. ال بۇل سۇراقتىڭ جاۋابى islam.kz سايتىندا جاريالاندى.
جاريالانعان ماقالادا اۋەلى ءيتتىڭ ەتى ارام ەكەنى ايتىلادى: «ءيتتىڭ ەتى - ارام. ءتىپتى، پايعامبارىمىز (س. ا. ۋ. ) ءيتتىڭ سىلەكەيى تيگەن ىدىستى جەتى رەت جۋىپ، ءبىرىنشىسىن توپىراقپەن تازالاۋدى بۇيىرعان. ونىڭ ۇستىنە، يت - جىرتقىش حايۋانعا جاتادى. ال، شاريعات جىرتقىش حايۋانداردىڭ ەتىن حارام ەتكەن. سوندىقتان دا، ءيتتىڭ ەتىن جەپ، ءسۇتىن ءىشۋ حارام».
بۇدان سوڭ ماقالادا ءيتتىڭ ءسۇتىن ەمگەن قوزى- لاقتىڭ ەتى ادال ەكەنى جازىلعان: «ەندىگە جەردە، «ونىڭ ءسۇتىن ىشكەن قوزى- لاقتاردىڭ ۇكىمى نە بولماق؟ ولاردىڭ دا ەتى حارامعا اينالا ما؟» - دەپ سۇرساڭىز، ەرتەرەكتە ءومىر سۇرگەن حانافي ءمازحابىنىڭ عۇلامالارى شوشقانىڭ ءسۇتىن ەمگەن قوزى جايىندا بىلاي دەگەن:
«ەشكىنىڭ لاعى شوشقا ءسۇتىن ەمىپ وسسە دە ەتىن جەۋ ماكرۋھ ەمەس. ويتكەنى، ونىڭ سالدارىنان ەتى وزگەرىسكە ۇشىرامايدى دا، ەتى يىستەنبەيدى».
ەندەشە، ءيتتىڭ ءسۇتى قوزىلاردىڭ ەتىنە اسەرىن تيگىزبەسە، ايتالىق، ەتتەرىنىڭ ءوڭى مەن ءدامى وزگەرىپ، بەينە ءبىر بوتەن ءيىس پايدا بولماسا، ول قوزىلاردىڭ ەتى ادال.
دەگەنمەن، اسىلىنە كەلگەندە، ادال مالعا، ادال حايۋاننىڭ ءسۇتىن بەرۋ كەرەك».
ءسوز سوڭىندا اۆتور ابدۋسامات قاسىم بۇنداي پىكىر ايتۋعا نەگىز بولعان ەڭبەكتەرگە سىلتەمە جاسايدى.
