استانادا اۆتوماتتاندىرىلعان اقىلى تۇراق پايدا بولدى - فوتو

استانا. قازاقپارات - بۇگىن ەلوردا ۆوكزالىنىڭ اۋماعىنداعى الاڭدا «استانا قالاسىندا تۇراق كەڭىستىگىن باسقارۋ» جوباسى تەستىلىك رەجىمدە جۇمىس ىستەي باستادى، دەپ حابارلايدى قالانىڭ رەسمي سايتى.

ۆوكزال اۋماعىندا كولىك قوزعالىسىن ۇيىمداستىرۋدى وزگەرتۋدىڭ ماقساتى - كەز كەلگەن كولىكتەن جولاۋشىلاردى وتىرعىزۋعا جانە تۇسىرۋگە قولايلى جاعداي جاساۋ، سونداي- اق، ۆوكزال ماڭىندا كولىك اعىنىن تارتىپكە كەلتىرۋ.

مامانداردىڭ الدىن الا باعالاۋى بويىنشا، جوبا جولاۋشىلاردى زاڭسىز تاسىمالداۋدى %70-80 عا ازايتۋعا، كولىكتەردىڭ اينالىمىن %30-40 عا ۇلعايتۋعا، ۆوكزال ماڭى اۋماعىندا جولعا تۇسەتىن سالماقتى %20-30 عا ازايتۋعا، سونداي- اق، تۇراق ورىندارىنىڭ جۇكتەمەسىن %40-50 عا تومەندەتۋگە ىقپال ەتەدى.

ايتا كەتەرلىگى، بۇگىنگى تاڭدا اتالعان اۋماقتا كولىك قۇرالدارىنىڭ قوزعالىسى مەن ۋاقىتىن ەسەپكە الاتىن اۆتوماتتاندىرىلعان جۇيە (بەينەتىركەۋ جۇيەسىمەن)، سونداي- اق، ءنومىر بەلگىلەرىن اۆتوماتتى تۇردە تانۋ جۇيەسى ورناتىلىپ، ىسكە قوسىلدى. قازىرگى كەزدە كولىكتى تۇراقتا 2 كۇننەن ارتىق ۋاقىتقا قالدىرۋعا بولمايدى.

 تەستىلىك رەجيمدە قوندىرعىنىڭ جۇمىسىن تەكسەرۋ جانە ونىڭ كەمشىلىكتەرىن انىقتاۋ جۇزەگە اسىرىلادى. وسى كەزەڭدە ۆوكزال ماڭى اۋماعىنا كىرگەن كولىكتەردەن تولەم الىنبايدى. ۆوكزال ماڭىنداعى تۇراقتىڭ سىيىمدىلىعى - 251 كولىك.

ستاتيستيكالىق مالىمەتتەرگە سۇيەنسەك، قازىرگى كەزدە وسى ۋچاسكەدە كۇن سايىنعى جولاۋشىلار اينالىمى - 7,5 مىڭ ادام. تاۋلىگىنە پويىزدىڭ 30 قۇرامى كەلەدى. سونىمەن قاتار، قالا ماڭىنا 18 باعدار قاتىنايدى.