وڭتۇستىك قازاقستاندا ادامنىڭ نيەتىنە قاراي سۋ بەرەتىن قۇدىق بار - فوتو
ول قاسيەتتى ورىن تۇركىستان قالاسىنان 60 شاقىرىمداي جەردە ورنالاسقان. كوپشىلىككە ۋكاشا اتا دەگەن اتپەن بەلگىلى بۇل مەكەنگە كەلۋشىلەر سانى ەش كەمىگەن ەمەس. قاسيەتتى قۇدىقتىڭ قۇدىرەتى نەدە؟
ءتۇس اۋاسىنا قاراي جۇرتشىلىق قاسيەتتى دەپ سانايتىن ۋكاشا اتا زياراتى مەن قۇدىققا قاراي جول تارتتىق. تۇركىستان قالاسىنىڭ ورتالىعىنان شامامەن 40 مينۋتتاي جول ءجۇرىپ، قاسيەتتى مەكەنگە دە كەلىپ جەتتىك.
العاشىندا كەلۋشىلەر قاراسى اسا كوپ ەمەس-ءتىن. كەيىنىرەك تەك وڭتۇستىك قازاقستان وبلىسى ەمەس، ءتىپتى الىس-جاقىن شەت ەلدەردەن كەلگەندەردى دە بايقادىق.
بۇل مەكەنگە بىرنەشە رەت كەلىپ، زيارات ەتۋشىلەرمەن قاتار العاش تابان تىرەگەندەرى دە بار. سولاردىڭ ءبىرى - شىمكەنتتىك ءاليا مۇرات قىزى.
28 جاستاعى تۇرعىن ۋكاشا اتا اتىنداعى اۋليەلى ورىننىڭ بار ەكەنىن 8- سىنىپتا وقىپ جۇرگەن كەزىندە بىلگەن ەكەن. مەكتەپ قابىرعاسىن بىتىرگەن ول جوعارى ءبىلىم الۋ ءۇشىن الماتىعا قونىس اۋدارعان.
ارۋ قولىنا ديپلومىن الىپ، جۇمىس بابىمەن قالادا قالىپ قويعان. سول سەبەپتەن، ۋاكاشا اتا اۋليە ورنىنا كەلۋگە ەش جولى تۇسپەگەن ءاليا بيىل نيەتتەنىپ جولعا شىعىپتى.
«شىنىمدى ايتسام، بۇل جەرگە كەلۋدى كوپتەن بەرى ارمانداپ ءجۇر ەدىم. نيەتتەنىپ كەلىپ تۇرعان جايىم بار. العاشىندا قۇدىقتا تاستالعان شەلەگىمە بىردە-ءبىر تامشى سۋ شىقپاي قالاما دەپ قورىقتىم. سەبەبى، دوس-جاران، تۋىستارىمنان سولاي بولاتىنىن ەستىگەنمىن. مۇنداعى شىراقشىلاردىڭ ايتۋىنشا، تاستالعان شەلەككە سۋ ادامنىڭ پەيىلىنە قاراي بەرەدى ەكەن. قۋانىشىما وراي، ءبىر شەلەك تولى سۋ شىقتى. قۇيىپ الدىم. اللا بارشانىڭ پەيىلىن كەڭىنەن جاراتسىن دەگەن تىلەگىم بار»، - دەدى ول.
وسى رەتتە قاسيەتتى سانالاتىن ۋكاشا اتا مەكەنىنىڭ تاريحىنا توقتالا كەتسەك. اڭىز بويىنشا ۋكاشا ساحابا مۇحاممەد پايعامباردىڭ كۇزەتشىسى بولعان كورىنەدى دەسەدى. ۋكاشانىڭ دەنەسى اتسا وق، شاپسا قىلىش وتپەيتىن قاسيەتكە يە بولىپتى.
دۇشپاندارى ۋكاشانىڭ تاڭ نامازى ۋاقىتىندا اللاعا قۇلشىلىق ەتەتىنىن ءبىلىپ، سول ءساتتى اڭدىپ، باسىن قىلىشپەن شاپقان. ءبىر قىزىعى، كەسىلگەن باس دۇشپانداردان دومالاپ قاشىپ، تاۋ ۇستىنە كوكتەن جاسىن تۇسكەن قۇدىققا ءتۇسىپ، عايىپ بولعان ەكەن.
تاريحي دەرەكتەرگە سۇيەنسەك، بۇل قۇدىق جەراستى جولدارىمەن سوناۋ مەككەدەگى ءزامزام بۇلاعىمەن جالعاساتىن كورىنەدى. سەبەبى ساحابانىڭ باسى ءزامزام بۇلاعىنان شىققان. سودان كەيىن ول پايعامباردىڭ قابىرىنىڭ اياق جاعىنا جەرلەنىپتى.
ۋكاشا اتا بۇل دۇنيەدەن باقيلىق بولعانعا دەيىن «ءيا، اللا، مەنىڭ باسىم پايعامبارىمنىڭ اياعىندا جاتسا ەكەن!» دەگەن تىلەك تىلەپتى. تاريحشىلار ونىڭ تىلەگى ورىندالدى دەگەندى ايتادى.
قۇدىق باسىنا كەلمەس بۇرىن الدىمەن زيارات ەتۋشىلەر ۇزىندىعى 20 مەتردەن استام قابىر باسىندا دۇعا جاسايدى. سودان سوڭ 800 مەتردەي قاشىقتىقتا جاتقان قۇدىققا كەلىپ، قاۋقا تاستايدى.
بىلەتىندەردىڭ ايتۋىنشا، اۋليەنىڭ قاسيەتتىلىگىنە كۇمان كەلتىرەتىندەر مەن اللا تاعالاعا دەگەن پىكىرى تەرىس ادامدارعا قۇدىقتان تاستالعان شەلەككە ءبىر تامشى دا سۋ شىقپايدى. ال ەندى ءبىرى شىعاتىن سۋ ادامنىڭ پەيىلىمەن بايلانىستى دەگەندى ايتادى.
قۇدىقتىڭ تەرەڭدىگى 28 مەتر ەكەن. ەسىمىن ايتقىسى كەلمەگەن شىراقشىنىڭ ايتۋىنشا، مۇندا سەنبى-جەكسەنبى كۇندەرى كەلۋشىلەردىڭ قاراسى كوبەيىپ كەتەدى ەكەن. ال اپتانىڭ دۇيسەنبىسىندە سايابىرسيدى.
