قازاقستاندا تۋبەركۋلەزدى رەنگەنسىز انىقتاۋدىڭ جاڭا ءادىسى ەنگىزىلىپ جاتىر

استانا. قازاقپارات - ەلوردا دەنساۋلىق ساقتاۋ باسقارماسىنىڭ باسشىسى ەرىك بايجۇنىسوۆ فليۋوروگرافياعا تۇسپەستەن تۋبەركۋلەزدى انىقتاۋعا باعىتتالعان قانات قاقتى جوبا تۋرالى ايتىپ بەردى.

ق ر پرەمەر- ءمينيسترىنىڭ ورىنباسارى داريعا نازاربايەۆانىڭ استانا قالاسىنىڭ مەديتسينا قىزمەتكەرلەرىمەن كەزدەسۋى بارىسىندا ە. بايجۇنىسوۆ بۇل تەحنولوگيا وڭتۇستىك كورەيادان جەتكىزىلگەنىن اتاپ ءوتتى.

«بيىلدان باستاپ تۋبەركۋلەزدى قان ارقىلى انىقتاۋ ادىسىنە العاش رەت كوشكەنىمىزدى اتاپ وتكىم كەلەدى. وڭتۇستىك كورەيا تاراپىمەن ءتيىستى كەلىسىمگە قول قويىپ، ولار جابدىقتاردى جەتكىزىپ، ورناتتى. قازىرگى كەزدە ءبىز ەكى ەمحانادا قانات قاقتى رەجىمدە زەرتتەۋلەر جۇرگىزىپ جاتىرمىز. ەگەر دە بۇل باعىتتاعى جۇمىستار ناتيجە كورسەتسە، وندا سكرينينگتىك زەرتتەۋلەر جۇرگىزەمىز. ياعني تۋبەركۋلەزدى قان ارقىلى انىقتايتىن بولامىز»، - دەدى باسقارما باسشىسى.

وسى رەتتە ول بۇل ءادىس ناۋقاستاردان تۋبەركۋلەزدى ناقتى انىقتاۋعا، سونداي- اق ەمدەلۋشىلەردىڭ انتيبيوتيكتەرگە سەزىمتالدىعىن بايقاۋعا مۇمكىندىك بەرەتىندىگىن جەتكىزدى.

«بيىل ءبىز تۋبديسپانسەردىڭ جاڭا عيماراتىن سالاتىن بولامىز. مەنىڭ ويىمشا، وندا ەم- دوم جاساۋدىڭ بارلىق تسيكلى قامتىلادى. وسى رەتتە تۋبەركۋلەزدى تۇبەگەيلى جەڭۋگە بولادى»، - دەدى ە. بايجۇنىسوۆ.

اۆتور: رۋسلان عابباسوۆ