قانات بوزىمبايەۆ: قازاقستان مەن كۋبا مۇناي-گاز سالاسىندا ىنتىماقتاستىق جايلى مەموراندۋمعا قول قويدى

استانا. قازاقپارات - ەكونوميكاسى ۇزاق جىلدار وقشاۋلانعان كۋبا ەندى-ەندى كوز اشىپ كەلەدى.

2008-جىلى راۋل كاسترو تىزگىندى ءوز قولىنا العالى ا ق ش- پەن ىمىراعا كەلىپ جاڭا رەفورمالار باستادى. باراك وبامانىڭ كۋباعا ساپارىنان كەيىن سانكسيالاردىڭ ءبىر بولىگى الىندى. ەسەسىنە، 2011-جىلدان باستاپ گاۆانا ەكونوميكانى ءارتاراپتاندىرۋ مەن الەۋمەتتىك سالانى جاڭعىرتۋعا باعىتتالعان باعدارلامالاردى جۇزەگە اسىرۋدا.

دەمەك اراسى الشاق جاتقان قازاقستانمەن دە ارىپتەستىكتىڭ كوكجيەگىن كەڭەيتۋدىڭ جاڭا مۇمكىندىكتەرى تۋىپ وتىر. ءبىزدىڭ استىققا قىزىعۋشىلىعى زور. ءبيداي تاسىمالىن ۇيىمداستىرۋ جوسپاردا بار. دەگەنمەن ەڭ الەۋەتتى سالا مۇناي-گاز سانالادى. رەسمي گاۆانا بۇعان دەيىن دە قازاق كاسىپكەرلەرىمەن بىرلەسىپ تاۋ-كەن ءوندىرىسى، ەنەرگەتيكا مەن مۇناي-حيميا جوبالارىن جۇزەگە اسىرۋعا دايىن ەكەنىن ايتقان. بۇگىن كەلىسىم قۇجات كۇيىندە بەكىتىلىپ، ەكىجاقتى ىنتىماقتاستىق جايلى مەموراندۋمعا قول قويىلدى.

ق ر ەنەرگەتيكا ءمينيسترى قانات بوزىمبايەۆ كۋبادا قول قويىلعان مەموراندۋم جايلى تولىعىراق ايتىپ بەردى، دەپ جازادى 24.kz.

«بۇگىن ءبىز كۋبانىڭ ەنەرگەتيكا جانە تاۋ-كەن ءوندىرىسى مينيسترىمەن ءوزارا ىقپالداستىق جونىندەگى مەموراندۋمعا قول قويدىق. بۇل ءبىرىنشى كەزەكتە مۇناي-گاز وندىرىسىنە قاتىستى. اسىرەسە، كۋبانى قورشاپ جاتقان كەن ورىندارىن ايتىپ وتىرمىن. ءتىپتى، قازاقستان مۇنايىن كۋبانىڭ مۇناي وڭدەۋ زاۋىتتارىنا جەتكىزۋ مۇمكىندىكتەرى دە قارالۋدا»، - دەيدى ق ر ەنەرگەتيكا ءمينيسترى قانات بوزىمبايەۆ.

ءمالىم بولعانداي، گاۆانا استانادا وتەتىن EXPO كورمەسىنە قىزىعۋشىلىق تانىتىپ وتىر. قاتىساتىنى جونىندە قۇجات بىلتىر قابىلدانىپ قويعان. بۇگىن جۇمىس ءتارتىبى بەكىدى. جالپى جاسىل تەحنولوگيالار سالاسىنداعى لاتىن امەريكا ەلدەرىنىڭ جەتكەن جەتىستىكتەرى از ەمەس. بىزگە قاجەت تاجىريبەنىڭ وزىق ۇلگىلەرى بار بۇل وڭىردە. ونى كۋبالىقتار كورمەگە الىپ كەلمەك ويدا.

«كومىر، مۇناي-گاز جوقتىعىنان ۇلكەن ىزدەنۋ جۇمىستارى، عىلىمي جۇمىستار اتقارىپ جاتىر. كەيبىر مەملەكەتتەردە قازىرگى كەزدە وسىنداي ەنەرگيانىڭ ۇلەسى %90 عا جەتتى. كۋبادا ول تومەندەۋ، ءبىراق ۇلكەن جوسپارلار قويىپ وتىر. اسقان قىزىعۋشۋلىقپەن ءبىزدىڭ كورمەگە دايىندالىپ جاتىر ەكەن»، - دەيدى «استانا EXPO-2017» ۇ ك» ا ق باسقارما ءتوراعاسى احمەتجان ەسىموۆ.