12:54, 02 - ءساۋىر 2016 | GMT +6
الماتى اكىمدىگى كۇلكى كۇنىندە نۇرتاس ادامبايدى الدادى
استانا. قازاقپارات - الماتى قالاسى اكىمشىلىگىنىڭ نۇرتاس ادامباي ازىلىنە بەرگەن جاۋابى العاشقىسىنان اسىپ ءتۇسىپ، جۇرتتى كۇلكىگە قارق قىلدى.
الماتى قالاسى اكىمشىلىگىنىڭ بۇل ارەكەتى جەلى قولدانۋشىلارىن قاتتى تاڭقالدىردى.
«كەلىن ءسابينا» فيلمىنىڭ رەجيسسەرى نۇرتاس ادامباي ءوزىنىڭ Facebook جەلىسىندەگى پاراقشاسىندا الماتى قالاسى اكىمشىلىگىنىڭ وزىنە قىزمەت ۇسىنعانى تۋرالى جازعان بولاتىن. ارتىنشا مۇنىڭ كۇلكى كۇنىنە وراي ايتىلعان ءازىلى ەكەنىن ايتسا دا، اكىمشىلىككە جۇمىسقا الىپ جاتسا، ايانباي ەڭبەكتەنەتىنىن تىلگە تيەك ەتكەن-دى.
ادامبايدىڭ جازباسىن كورگەن اكىمشىلىك وعان كەلىپ، قىزمەتتىك كۋالىگىن الىپ كەتۋى كەرەكتىگىن ايتىپ قالجىڭداعان.
ەستەرىڭىزگە سالا كەتسەك، نۇرتاس ادامبايدىڭ الماتى اكىمىنىڭ كەڭەسشىسى «بولىپ تاعايىندالعانى» تۋرالى حابارلاعانبىز.
