نۇرسۇلتان نازاربايەۆ كارنەگي قورىنىڭ پرەزيدەنتى ۋيليام بەرنسپەن كەزدەستى

استانا- ۆاشينگتون. قازاقپارات - مەملەكەت باسشىسى نۇرسۇلتان نازاربايەۆ ا ق ش استاناسىندا كارنەگي قورىنىڭ پرەزيدەنتى ۋيليام بەرنسپەن كەزدەسۋ وتكىزدى، دەپ حابارلايدى اقوردانىڭ باسپا ءسوز قىزمەتى.

كەزدەسۋگە ا ق ش- تىڭ بۇرىنعى قورعانىس ءمينيسترى ۋ. پەرري، ا ق ش- تىڭ بۇرىنعى سەناتورى س. نانن، كاليفورنيا شتاتىنىڭ گۋبەرناتورى دج. براۋن، CNN ارناسىنىڭ نەگىزىن قالاۋشى ت. تەرنەر، «Gap»  كومپانياسىنىڭ بۇرىنعى باسشىسى ە. گاست قاتىستى.

كەزدەسۋ بارىسىندا حالىقارالىق كۇن تارتىبىندەگى وزەكتى ماسەلەلەر، سونداي-اق قازاقستان مەن ا ق ش- تىڭ جاھاندىق انتيادرولىق قوزعالىس اياسىنداعى ىنتىماقتاستىعى تالقىلاندى.

نۇرسۇلتان نازاربايەۆ بۇرىنعى سەرىكتەستەرمەن كەزدەسىپ، ولارمەن قازاقستان-امەريكا ىقپالداستىعىن ودان ءارى نىعايتۋ جولدارىن تالقىلاۋ مۇمكىندىگى تۋعانىنا ريزاشىلىق ءبىلدىردى.

***

كارنەگي قورى - الەم ەلدەرى اراسىنداعى ىنتىماقتاستىقتى نىعايتۋ باستى مىندەتى بولىپ جاريالانعان كوممەرتسيالىق ەمەس جەكەمەنشىك ۇيىم. 1910-جىلى قۇرىلعان قور حالىقارالىق ساياسات سالاسىنداعى ءىرى ساراپتاۋ-تالداۋ ورتالىعىنىڭ ءبىرى بولىپ سانالادى.