جۋرناليست ازامات قالىمبەتوۆ قايتىس بولدى

 استانا. قازاقپارات - الماتىدا تانىمال جۋرناليست ازامات قالىمبەتوۆ دۇنيەدەن وزدى. بۇقارالىق اقپارات قۇرالدارىندا جاريالانعان مالىمەتتەرگە قاراعاندا ا. قالىمبەتوۆ ۇزاققا سوزىلعان ميداعى ىسىك سالدارىنان قايتىس بولعان.

 جۋرناليستتىڭ اپكەسى ناتاليا قالىمبەتوۆانىڭ ايتۋىنشا، ازامات ءبىراز ۋاقىتتان بەرى اۋرۋحانادا جاتتى. قاتەرلى اۋرۋ تۋرالى دياگنوز تەك اعىمداعى جىلدىڭ قاڭتار ايىندا بەلگىلى بولعان. سودان كەيىن تۋىستارى ونى وڭتۇستىك كورەياعا اپارىپ ەمدەتۋگە تىرىسقان ەكەن. الايدا، سوڭعى ۋاقىتتا ا. قالىمبەتوۆتىڭ ناۋقاسى كۇرت اۋىرلاپ، جاعدايى قيىنداپ كەتكەندىكتەن، دارىگەرلەر وعان رۇقسات بەرمەگەن.

 جۋرناليست ازامات قالىمبەتوۆ ءار جىلدارى «حابار» تەلەارناسىندا ءتىلشى قىزمەتىن اتقاردى. «قازاقستان» تەلەارناسىنىڭ جانە «وڭ- ت ۆ» ارناسى جاڭالىقتار قىزمەتىنىڭ باس رەداكتورى بولعان.

اۆتور: قانات مامەتقازى ۇلى