17:15, 29 - ناۋرىز 2016 | GMT +5
الماتىدا تالعات ەرمەگيايەۆتىڭ سەنىمدى تۇلعاسى سايات نادىربايەۆ ۇستالدى
الماتى. قازاقپارات - الماتىدا سىبايلاس جەمقورلىققا قارسى كۇرەس ۇلتتىق بيۋروسىنىڭ قىزمەتكەرلەرى ىزدەۋ شارالارىنىڭ ناتيجەسىندە «استانا ەكسپو-2017» ۇ ك ەكس-ءتوراعاسى تالعات ەرمەگيايەۆتىڭ سەنىمدى تۇلعاسى سايات نادىربايەۆتى ۇستادى.
بۇل تۋرالى ق ر سىبايلاس جەمقورلىققا قارسى ۇلتتىق بيۋروسىنىڭ باسپا ءسوز قىزمەتى حابارلادى.
كۇدىكتىگە «ەكسپو-2017» دۇنيەجۇزىلىك كورمەسىن وتكىزۋگە باعىتتالعان قاراجاتتى اسا ءىرى كولەمدە ۇرلاۋعا قاتىستى ايىپ تاعىلدى.
«سايات نادىربايەۆ ەكسپو-نى وتكىزۋگە جۇمسالاتىن قارجىنى ۇرلاپ، شوتتان اۋدارۋ بويىنشا تاپسىرمالاردى ءوزى ورىنداعان. كەيىننەن الىنعان اقشانى ت. ەرمەگيايەۆكە جىبەرىپ وتىرعان»، - دەلىنگەن باسپا ءسوز حابارلاماسىندا.
س. نادىربايەۆ 2015 -جىلدىڭ تامىزىنان بەرى ىزدەۋدە جۇرگەن. ونى جاسىرىپ قالۋعا تىرىسقان تۇلعالاردىڭ كىم ەكەندىگى دە انىقتالدى.
اتالعان دەرەك بويىنشا تەرگەۋ امالدارى جالعاسۋدا. قازىر كۇدىكتى قالالىق ءى ءى د ۋاقىتشا ۇستاۋ وقشاۋلاعىشىنا قامالدى.
اۆتور: گۇلميرا عوسمانالي
