ۇلىقپان جولداسوۆتىڭ اناسى ۇلىنىڭ تانىمال بولاتىنىن تۇسىندە كورگەن
ءانشى بويىنداعى ونەردىڭ ۇشقىنىن قانمەن كەلگەن دەپ ەسەپتەيدى. سەبەبى اكەسى مىرزاباي دومبىرامەن ءان ايتىپ وتىراتىندىعى، اناسى دا ونەردەن قۇر الاقان ەمەس ەكەندىگى وسىنىڭ دالەلى.
"مەن «قىرىقبايمىن» ، شەشەم قىرىققا كەلگەندە دۇنيەگە اكەلگەن. ءۇيدىڭ كەنجەسىمىن. نەگىزىندە اكە- شەشەمدى باعىپ، قارا شاڭىراقتا وتىراتىن بالامىن عوي. مۋزىكاعا اۋەستىگىمدى، حالىققا تانىلعانىمدى كورىپ، انام: «بالام، سەن ۇلكەن ساحناعا شىق، ونەرىڭدى ەلىڭە ارنا...» دەپ اق باتاسىن بەردى"، - دەيدى سازگەر.
«وتباسىمىزدا التى ۇل، ءبىر قىز. ەركە بولعان جوقپىن. مەكتەپتە جاقسى وقۋشى بولدىم. قۇرمەت تاقتاسىندا سۋرەتىم ءىلىنىپ تۇراتىن. ەشقاشان ساباقتان قاشقان ەمەسپىن. 5-6- ساباقتاردا وزگەلەر قاشىپ كەتسە دە، مەن باراتىنمىن"- دەدى ۇلىقپان جولداسوۆ.
ال مەكتەپتەن كەيىن دۇرىستاپ ءبىلىم الماعان ۇلىقپان وقىعانىنان گورى تاجىريبەسى كوپ ەكەندىگىن ايتقان. ءتىپتى، الماتىداعى ەسترادا- سيرك كوللەدجىنە 4 رەت وقۋعا تاپسىرىپ، 4 رەت بەلگىلى سەبەپتەرمەن وقىماعان كورىنەدى.
بارماقتاي باق پەن ەڭبەكتىڭ ارقاسىندا ەلگە تانىلعان ءانشىنىڭ ءوزى دە، اناسى دا جاقسى ءتۇس كورگەن ەكەن.
" ءوزىم دە بىردە ءتۇس كوردىم. احمەتحان دەگەن مولدانىڭ ۇيىنەن كەلىپ، ايعان ءشاي جاساعانشا، زالدا كىلەم ۇستىندە ۇيىقتاپ قالىپپىن. قاس پەن كوزدىڭ اراسىندا دەيدى عوي. تۇسىمدە اپپاق قۇستار ۇشىپ بارا جاتىر ەكەن. ادەتتە قۇستار بىتىراڭقىراپ ۇشپاي ما؟ مىنا قۇستار سىزعىشپەن سىزىپ قويعانداي، ءتۇزۋ سىزىقپەن ءتىپ- تىكە ۇشىپ بارا جاتىر. ۇشىپ بارا جاتىر ما، الدە ۇشىپ كەلە جاتىر ما - تۇسىنبەي دە جاتىر ەكەنمىن. قاسىمدا ايداربەك وڭايبايەۆ دەگەن دوسىم بار ەكەن، سودان سۇراپ جاتىرمىن. «بەرى قاراي كەلە جاتىر عوي» دەپ ول ايتىپ جاتقاندا وياتىپ جىبەردى.
"داستارحان باسىندا اناما ايتتىم، جاقسى بولادى ەكەن، بار جاقسىلىعىڭ، ريزىعىڭ قايتادى ەكەن دەپ جورىدى. انا عوي ەندى. سوسىن ءوزىنىڭ ءتۇسىن ايتتى. تۇسىندە بۇكىل اۋىل بولىپ اساۋ اتتى ۇستاي الماي ءجۇر ەكەن. سونى جالىنان ۇستاپ، مەن ءمىنىپ كەتىپپىن"، - دەپ جالعاستىردى ءسوزىن جولداسوۆ.
«بىزدەردى ءبىر اينالىپ، ۇزاققا شاۋىپ كەتتىڭ. بۇكىل حالىق مىنە الماي جاتقاندا، سەن تىزگىندەدىڭ، ۇزاققا شابادى ەكەنسىڭ...» دەدى. سودان كوپ ۇزاماي ءبىر جىلدىڭ ىشىندە ءۇي الدىم، الماتىعا كەتتىم، «تاماشاعا» شىقتىم، «التىنايلاتىپ» ءان ايتتىم، تەلەديداردان كورىندىم. ەڭ باستىسى، ءتۇستى جاقسىلىققا جورۋ كەرەك. انامنىڭ سول ءتۇسى ورىندالدى دەپ ويلايمىن..." - دەپ ەسكە الدى.
مۋزىكانت بالا كەزىندە الەمدى اۋزىنا قاراتقان گيتاريست بولسام دەپ ارمانداعان. دەسەك تە، ۇلىقپاندى الەم تانىماسا دا، قازاق ەلىنە بەلگىلى ازامات بولدى. تەك بەلگىلى ءانشى عانا ەمەس، قازاق مۋزىكا ونەرىنە اسەم اندەر قوسقان كومپوزيتورعا اينالدى.
ورىندالماعان بالا ارمانى جايلى بىلاي دەپ ەسكە الدى: " ءبىراق وعان جەتە المادىق قوي. گيتارانى سەرىك قىلعانىما 39 جىل بولىپتى. بالا كەزىمدە گيتارا تاپشى بولدى. مەندە بولعان جوق. ول كەزدە كوپ نارسە دەفيتسيت ەدى عوي. ماعان گيتارا مەن ۆەلوسيپەد ارمان بولدى. ۆەلوسيپەد مىنە المادىم. سەبەبى، الىس جاقتا تۇردىق تا، ءبىز دۇكەنگە بارعانشا جوق بولاتىن"، - دەيدى سازگەر.
انا اۋىلدا نەمەسە مىنا اۋىلدا گيتارا بار دەسە، ىزدەپ بارىپ وينايتىنمىن. ارتىنان كلۋبتىڭ ءانسامبلىنىڭ قۇرامىنا كىرگەننەن كەيىن، كلۋبتىڭ گيتاراسىمەن ويناپ ءجۇردىم. «ۋرال» ، «تونيكا» دەگەن گيتارالار بولاتىن. سوعان قىزىعاتىنبىز. يسا دەگەن اعام گيتارانى قولدان جاسايتىن. سونى داڭعىرلاتاتىنمىن. تەلەفوننىڭ سويلەيتىن جاعىنداعى مەمبراناسىن الىپ، ونى گيتاراعا جاپسىرىپ، ەكى سىمىن راديوعا قوسىپ، شىققان دىبىستى ەستىپ، توق گيتارا دەپ ءماز بولاتىنبىز"، - دەپ ەسكە الدى جاستىق كەزىن كومپوزيتور.
