08:19, 28 - ناۋرىز 2016 | GMT +5
تاليبان پاكىستانداعى جارىلىستى ءوز مويىنىنا الدى
استانا. قازاقپارات - پاكىستاننىڭ لاحور قالاسىندا بولعان جارىلىس ءۇشىن جاۋاپكەرشىلىكتى تاليبان قوزعالىسى ءوز مويىنىنا الدى.
سوڭعى مالىمەتتەر بويىنشا، وقيعا سالدارىنان كەم دەگەندە 69 ادام قازا تاپتى.
تاليبتەردىڭ وكىلى قاستاندىق قالانىڭ حريستياندار كوپ تۇراتىن بولىگىندە ادەيى جۇزەگە اسىرىلعانىن اتاپ ءوتتى.
جارىلىس جەكسەنبى كۇنى تاڭەرتەڭ، قالا ورتالىعىنداعى گۇلشان-ي-يكبال ساياباعىنىڭ جانىنداعى كولىك تۇراعىنىڭ قاسىندا، ويىن الاڭىنان بىرنەشە مەتر جەردە بولدى.
بۇل جەردە پاسحا مەرەكەسىن تويلاۋ ءۇشىن بۇكىل وتباسىمەن جينالعان جەرگىلىكتى حريستياندار كوپ بولعان.
پوليتسيا كوميسسارىنىڭ ورىنباسارى موحامماد ۋسمان جاراقات العان ادامداردىڭ سانى 190 نان اسىپ كەتكەنىن مالىمدەدى.
