فۋتبول: قازاقستان قۇراماسى ءازىربايجاندى ۇتتى
«قازسپورت» تەلەارناسىنان كورسەتكەنىندەي، بۇل ويىندا ءازىربايجان قۇراماسى الاڭ يەلەرى بولىپ سانالدى. سوعان قاراماستان، كەزدەسۋ قازاقستاندىقتاردىڭ باسىمدىلىعىمەن ءوتتى.
8-مينۋتتا سەرىكجان مۇجىقوۆ بۇرىشتامادان باۋىرجان يسلامحانعا پاس بەرسە، «قايراتتىڭ» كاپيتانى ونى ايىپ الاڭىنا قاراي اۋەلەتتى. مۇنى ۇتىمدى پايدالانعان ماقسات بايجانوۆ باسپەن دوپتى قاقپاعا سۇڭگىتە سالدى. بۇدان كەيىن ۇلان قونىسبايەۆتىڭ گول سوعاتىنداي مۇمكىندىگى بولدى.
ەكىنشى تايمدا ءازىربايجان قۇراماسى العا ۇمتىلىپ باققانىمەن، ەشتەڭە بىتىرە المادى. ولارعا كەيدە شەبەرلىك جەتىسپەي جاتسا، بىرنەشە رەت ورال فۋتبولىنىڭ تۇلەگى، قازىر رەسەي پرەمەر- ليگاسىندا كوش باستاپ كەلە جاتقان كوماندانىڭ ءبىرى «روستوۆتىڭ» نامىسىن قورعاپ جۇرگەن ستاس پوكاتيلوۆ ءوز قاقپاسىن امان الىپ قالدى. اسىرەسە، ول ويىن سوڭىنا تامان ازەربايجاندىقتاردىڭ ايىپ سوققىسىن قايتارا ءبىلدى. ەسەسىنە قازاقستاندىقتار ەسەپتى ۇلعايتىنداي مۇمكىندىكتەردى ءمۇلت جىبەرىپ جاتتى. اۋەلى سەرگەي حيجنيچەنكوعا دالدىك جەتىسپەسە، ودان كەيىن ماقسات بايجانوۆتىڭ سوققىسىن ءازىربايجان قۇراماسىنىڭ قاقپاشىسى اياعىمەن قايتارا الدى. قوسىمشا مينۋتتاردا الدىمەن عافۋرجان سۇيىمبايەۆتىڭ، ىلە- شالا الەكسەي شەتكيننىڭ سوققىلارى قاقپا ماڭدايشاسىنان كەرى قايتتى.
ءسويتىپ، قازاقستان قۇراماسى بيىلعى ماۋسىمداعى العاشقى ويىنىندا جەڭىسكە جەتتى.
ايتا كەتەيىك، قازاقستاندىقتاردى بۇل ماتچقا قازىرگى كەزدە «اقجايىق» كومانداسىنىڭ باس باپكەرى مىندەتىن اتقاراتىن تالعات بايسۋفينوۆ باستاعان ماماندار دايىنداپ اكەلدى. ولار شەتتەن ادام ىزدەمەي، قازاق فۋتبولىنىڭ تۇلەكتەرىنە كوبىرەك مۇمكىندىك بەردى. بۇل، ارينە، قۇپتارلىق جايت.
ەندى قازاقستان ۇلتتىق قۇراماسى 29- ناۋرىزدا گرۋزيا فۋتبولشىلارىمەن تاعى ءبىر جولداستىق كەزدەسۋ وتكىزەدى.
اۆتور: ەلجان ەرالى
