باقتىقوجا ىزمۇحامبەتوۆ ءماجىلىس ءتوراعاسى بولدى
بۇدان بۇرىن حابارلانعانداي، پارلامەنت ءماجىلىسىنىڭ جالپى وتىرىسىندا ق ر پارلامەنتى ءماجىلىسىنىڭ دەپۋتاتى نۇرلان ءابدىروۆ ءماجىلىس ءتوراعالىعىنا باقتىقوجا ىزمۇحامبەتوۆتى ۇسىندى.
تالقىلاۋ بارىسىندا دەپۋتاتتار ۇسىنىلعان كانديداتتى قولداپ داۋىس بەرۋ بارىسىندا ءبىراۋىزدان ماقۇلدادى.
بۇگىن ق ر پارلامەنتى ءماجىلىسىنىڭ جالپى وتىرىسىندا ءماجىلىس ءتوراعاسىنىڭ ەكى ورىنباسارى سايلاندى.
«ق ر پارلامەنتى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭنىڭ 9 - بابى 8 - تارماعىنا سايكەس پالاتا دەپۋتاتتارى اراسىنان ءماجىلىس ءتوراعاسىنىڭ ۇسىنۋىمەن، پالاتا دەپۋتاتتارىنىڭ باسىم داۋىسىمەن سايلاناتىن ەكى ورىنباسارى بولادى. سوندىقتان وزىمە بەرىلگەن قۇقىقتى پايدالانىپ، ق ر پارلامەنتى ءماجىلىسى ءتوراعاسىنىڭ ورىنباسارلارى رەتىندە ۆلاديمير بوجكو مەن گۇلميرا يسيمبايەۆانىڭ كانديداتۋراسىن ۇسىنامىن»، - دەدى ءماجىلىس سپيكەرى باقتىقوجا ىزمۇحامبەتوۆ.
وسىدان كەيىن دەپۋتاتتار ءماجىلىس ءتوراعاسىنىڭ ۇسىنىستارىنا داۋىس بەرىپ، ونى تولىعىمەن قولدادى.
باقتىقوجا سالاحاتدين ۇلى ىزمۇحامبەتوۆ - 1948 -جىلى گۋريەۆ وبلىسى (قازىرگى اتىراۋ وبلىسى)، تەڭىز اۋدانىندا تۋعان. ۋفا مۇناي ينستيتۋتىن بىتىرگەن. تەحنيكا عىلىمدارىنىڭ دوكتورى.
1971-1991 -جىلدارى «ەمبى مۇناي» بىرلەستىگىنىڭ پرورۆا بۇرعىلاۋ كونتورىندا، «قازمۇنايگازبارلاۋ» باسقارماسىندا، قازاق گەولوگيالىق بارلاۋ عىلىمي- زەرتتەۋ مۇناي ينستيتۋتىندا، شەتەلدىك ءىسساپاردا كەڭەس مۇناي بارلاۋ ەكسپەديتسياسىندا جۇمىس ىستەدى.
1991-1992 -جىلدارى قازاقستان رەسپۋبليكاسىنىڭ گەولوگيا جانە جەر قويناۋىن قورعاۋ مينيسترلىگىنىڭ ءبولىم باستىعى لاۋازىمىن اتقاردى.
1992-1993 -جىلدارى قازاقستان رەسپۋبليكاسى گەولوگيا جانە جەر قويناۋىن قورعاۋ مينيسترلىگىنىڭ مۇناي جانە گاز باسقارماسىنىڭ باستىعى بولىپ ىستەدى.
1993 جانە 2003 -جىلدار ارالىعىندا - «قازاق تۇرىك مۇناي» بىرلەسكەن كاسىپورنىنىڭ باس ديرەكتورى، «قازمۇنايگاز» ۇ ك ج ا ق ۇلەستەردى باقىلاۋ جونىندەگى اتقارۋشى ديرەكتورى، «قازمۇنايتەڭىز» تەڭىز مۇناي كومپانياسىنىڭ باس ديرەكتورى، «قازمۇنايگاز» ۇ ك ج ا ق ب ك ۇلەستەردى باسقارۋ جونىندەگى باسقارۋشى ديرەكتورى لاۋازىمدارىن اتقاردى.
2003 -جىلدىڭ جەلتوقسانىنان 2006 -جىل ارالىعىندا - قازاقستان رەسپۋبليكاسىنىڭ ەنەرگەتيكا جانە مينەرالدىق رەسۋرستار ءبىرىنشى ۆيتسە-ءمينيسترى. 2006-2007 -جىلدارى - قازاقستان رەسپۋبليكاسىنىڭ ەنەرگەتيكا جانە مينەرالدىق رەسۋرستار ءمينيسترى.
2007-2012 -جىلدار ارالىعىندا - باتىس قازاقستان وبلىسىنىڭ اكىمى.
2012 -جىلى قازاقستان رەسپۋبليكاسى پارلامەنتى ءماجىلىسىنىڭ V شاقىرىلىمىنىڭ دەپۋتاتى بولدى،
قازاقستان رەسپۋبليكاسى پارلامەنتى ءماجىلىسى ءتوراعاسىنىڭ ورىنباسارى.
بيىلعى سايلاۋدا التىنشى شاقىرىلىم دەپۋتاتى بولار الدىندا اتىراۋ وبلىسىنىڭ اكىمى قىزمەتىن اتقارعان ەدى.
اۆتور: رۋسلان عابباسوۆ
