ەلباسى ءبىلىم جانە عىلىم مينيسترلىگىنە مەكتەپتەردە بەس كۇندىك وقۋ اپتاسىنا كوشۋ جۇمىستارىن باستاۋدى جۇكتەدى
«ەكونوميكالىق ىنتىماقتاستىق جانە دامۋ ۇيىمىنا ينتەگراتسيالانۋدامىز جانە بىزگە بۇل باعىتتا جۇيەلى جۇمىستار اتقارۋىمىز كەرەك. بارشا دامىعان ەلدەردەگى مەكتەپتەردە بەس كۇندىك وقۋ اپتاسى ەنگىزىلگەن. بالاعا ءوزىن قالپىنا كەلتىرۋگە، پەداگوگقا دەمالىپ، الداعى ساباقتارعا دايىندالۋعا مۇمكىندىك بەرىلەدى. كەيبىرەۋىندە 4 كۇندىك وقۋ اپتاسى ىسكە قوسىلعان جانە بۇگىندە وسىنداي فورماتقا كوشۋ دامىعان ەلدەردىڭ جالپى الەمدىك ترەندىنە اينالدى. وقىتۋ اپتاسى قىسقارعان كەزدە ءبىلىم بەرۋدىڭ ناتيجەلىلىگى ارتاتىنىن عالىمدار عىلىمي تۇردە دالەلدەدى. بىزگە دە وسى تاجىريبەنى ەنگىزۋ كەرەك. وسى تۇرعىداعى شارالاردى ءبىلىم جانە عىلىم مينيسترلىگى باستاۋىش سىنىپتاردان باستاۋى قاجەت»، - دەدى پرەزيدەنت.
مەملەكەت باسشىسى قازاقستانداعى مەكتەپتەردە كەيبىر پاندەر بويىنشا بالالارعا اۋىر سالماق ءتۇسىپ تۇرعانىن، وسى ورايدا كەيبىر پاندەردى بىرىكتىرۋ كەرەكتىگىن نەمەسە وقۋ ۇدەرىسىنەن الىپ تاستاۋ قاجەتتىگىن اتاپ ءوتتى.
عالىمداردىڭ بولجامىنا قاراعاندا، 2020 - جىلعا قاراي جەر حالقىنىڭ ەلۋ پايىزىن ساندىق تەحنولوگيالاردى مەڭگەرگەن بالالار قۇرايتىنىنا توقتالعان ن. نازاربايەۆ، «مەكتەپ وقۋشىلارىنىڭ جاڭا تولقىنىنا تولىقتاي ساندىق تەحنولوگيالار الەمىندە ءومىر سۇرۋگە، ءبىلىم الۋعا، سونداي- اق جۇمىس ىستەۋگە تۋرا كەلەدى. سوندىقتان مەكتەپتەردى اقپارانتتاندىرۋدى جالعاستىرۋ قاجەت. ونسىز ءبىلىم بەرۋ سالاسىندا جاڭا ماقساتتاردى شەشۋ مۇمكىن ەمەس. ەكى جارىم مىڭ مەكتەپ ينتەرنەتكە قوسىلعان، قوسىمشا تاعى دا 1,5 مىڭ مەكتەپتى قوسۋعا قارجى ءبولىندى. ۇكىمەتكە اكىمدىكتەرمەن بىرلەسە بارلىق مەكتەپتەردە ينتەرنەتتىڭ ۇزدىكسىز جۇمىس ىستەۋىن قامتاماسىز ەتۋدى تاپسىرامىن»، - دەدى.
بۇل رەتتە پرەزيدەنت ۇلتتىق وپەراتورلار الەۋمەتتىك جاۋاپكەرشىلىك تانىتىپ، مەكتەپتەرگە ارنايى تاريفتەر ۇسىنۋى كەرەكتىگىن اتاپ ءوتتى.
«مەن قازاقستاندا 20 زياتكەرلىك مەكتەپتىڭ قۇرىلىسى تۋرالى جاريالاعان بولاتىنمىن. بۇگىندە ەلىمىزدە بارشا جيىرما زياتكەرلىك مەكتەپ سالىنعانىن ايتا الامىن. بۇل باعىتتاعى شارالار مەكتەپتەگى بىلىمدە وتە ماڭىزدى سەرپىن بولىپ تابىلادى»، - دەدى پرەزيدەنت.
وسى رەتتە مەملەكەت باسشىسى اتالعان مەكتەپتەردە ءبىلىم بەرۋدىڭ جاڭا مازمۇنى اپروباتسيادان وتەتىنىن جانە بۇل باعىتتا جاقسى ناتيجەلەرگە قول جەتكىزىلگەنەن اتاپ ءوتتى.
«بيىل وسى تاجىريبەنى تاعى 30 مەكتەپتەگى ءبىرىنشى سىنىپتارعا ەنگىزۋ جوسپارلانىپ وتىر، الايدا بۇل جۇمىس تىم باياۋ قارقىنمەن ءجۇرىپ جاتىر. زياتكەرلىك مەكتەپتەردە اپروباتسيادان ءساتتى وتكەن بارلىق تاجىريبە بارشا ەلىمىز بويىنشا 3 جىلدا نەمەسە ارى كەتسە 4 جىلدا ەنگىزىلۋى ءتيىس. ق ر ءبىلىم جانە عىلىم مينيسترلىگىنە وسى جۇمىستى قامتاماسىز ەتۋدى تاپسىرامىن»، - دەدى ن. نازاربايەۆ.
اۆتور: رۋسلان عابباسوۆ
