مەملەكەت باسشىسى: كوماندالىق اۋىسۋ تاجىريبەسى تىيىلدى
«اعىمداعى جىلدىڭ 1 - قاڭتارىنان قازاقستان جاڭا قۇقىقتىق ينستيتۋتتىق ورتا جاعدايىندا ءومىر سۇرۋدە. ول 59 زاڭ مەن 400 دەن استام زاڭ اياسىنداعى اكتىلەردىڭ قابىلدانۋىمەن قالىپتاستى. كەشەگى جوسپار بۇگىنگى كۇنى شىنايىلىققا اينالدى»، - دەدى ەلباسى.
ق ر پرەزيدەنتى ءاربىر قازاقستاندىق ءۇشىن الەمنىڭ ەڭ دامىعان ەلدەرىندەگى مۇمكىنشىلىكتەرمەن بارا- بار جاڭا جاعدايلار اشىلاتىندىعىن اتاپ ءوتتى.
«بىرىنشىدەن، مەملەكەتتىك اپپارات قانداي دا ءبىر كولەڭكەلى شارتتار مەن ارتىقشىلىقسىز مەريتوكراتيا جاعدايىندا جۇمىس ىستەۋگە باعىتتايتىن شارالار قابىلداندى. كوماندالىق اۋىسۋ تاجىريبەسى تىيىلدى. ءبىرىنشى باسشى اۋىسقان كەزدە ونىمەن بىرگە ادامداردىڭ ءبىر توبى قوسا اۋىساتىن ەدى. ەگەر وتكەن جىلدىڭ ءۇش ايىندا 1722 شەنەۋنىك اۋىسسا، اعىمداعى جىلى 90 ادام اۋىستى»، - دەدى ن. نازاربايەۆ.
جيىن بارىسىندا ەلباسى التىنشى پارلامەنتتىڭ زاڭ شىعارماشىلىعىنداعى اتقارىلاتىن نەگىزگى مىندەتتەرىنە توقتالىپ ءوتتى.
«مونوپولياعا قارسى سالانى رەفورمالاۋدىڭ ەكىنشى كەزەڭىندە باسەكەلەستىك تۋرالى زاڭعا وزگەرىستەر مەن تولىقتىرۋلار ەنگىزۋ قاجەت ەتىلەدى. بۇدان بولەك، مەملەكەتتىك فۋنكتسيالاردى ودان ءارى باسەكەلەستىك ورتاعا بەرۋ بويىنشا زاڭنامالاردى جاڭارتۋ كەرەك. جەرگىلىكتى ءوزىن- ءوزى باسقارۋ تۋرالى زاڭنامالىق اكتىلەر وزدەرىنىڭ بيۋدجەتتىك مەنشىكتەرىن ءتيىمدى باسقارۋى ءۇشىن جەتىلدىرىلۋى ءتيىس. سونىمەن قاتار، الەمدىك ەكونوميكانىڭ جانە حالىقارالىق قاتىناستاردىڭ دامۋى پارلامەنت پەن مەملەكەتتىك ورگانداردىڭ، ءبىزدىڭ جوسپارلارىمىزدىڭ الداعى كەزەڭىنە ءوز وزگەرىستەرىن جاساۋى مۇمكىن»، - دەدى ن. نازاربايەۆ.
سونداي- اق، ەلباسى ءماجىلىس دەپۋتاتتارى زاڭ شىعارماشىلىعى پروتسەسىندە سەناتپەن ءوزارا سىندارلى جۇمىس اتقاراتىنىنا سەنىم ءبىلدىردى.
«ءماجىلىستىڭ الداعى وكىلەتتىك كەزەڭىن تۇتاستاي قامتيتىن زاڭ شىعارماشىلىعى جوسپارىن ازىرلەۋ اسا ماڭىزدى. بۇل رەتتە جاڭا جاعدايلاردا تۇتاستاي پارلامەنتتىڭ جالپى ساياسي ءرولى مەن جاۋاپكەرشىلىگى ارتا تۇسەتىنىن ەرەكشە اتاپ وتكىم كەلەدى. پارلامەنتشىلەردىڭ پارتيالار ارالىق ءوزارا ارەكەتتەستىگىن كۇشەيتىپ، بارلىق فراكسيالار مەن دەپۋتاتتىق توپتاردىڭ ورنىقتى جۇمىسىنا قول جەتكىزۋ قاجەت. قازاقستاندىق دەپۋتاتتاردىڭ حالىقارالىق پارلامەنتتەر مەن حالىقارالىق قاۋىمداستىقتار جۇمىسىنا قاتىسۋى دا وزەكتى. وسىلايشا، بىزگە بىردەن جۇمىسقا كىرىسۋ كەرەك. ءبارى تۇسىنىكتى. جاڭا دەپۋتاتتار جۇمىسقا بىردەن قوسىلادى، ال بۇرىنعى شاقىرىلىمنان كەلە جاتقان تاجىريبەلى دەپۋتاتتار جاڭا جاعدايعا كوشۋگە شاپشاڭ بەيىمدەلەدى دەپ ويلايمىن»، دەدى ن. نازاربايەۆ.
ەسكە سالايىق، 20 - ناۋرىزدا قازاقستاندا ماجىلىسكە كەزەكتەن تىس سايلاۋى ناتيجەسىندە پارلامەنتتىڭ التىنشى شاقىرىلىمى ىسكە كىرىسىپ وتىر. پارلامەنت ماجىلىسىندە «نۇر وتان» پارتياسى 84 ورىنعا يە بولىپ، قالعان 14 ورىن «اق جول» دەموكراتيالىق پارتياسى مەن قازاقستان كوممۋنيستىك حالىق پارتياسىنا ءبولىندى. مۇنىمەن قوسا قر پارلامەنتى ماجىلىسىنە 9 دەپۋتاتتى قازاقستان حالقى اسسامبلەياسى سايلادى.
اۆتور: قانات مامەتقازى ۇلى
