ەلباسى: كىم جاقسى جۇمىس ىستەسە، سول مول جالاقى الادى
«تەڭ مۇمكىنشىلىكتەر جۇيەسى رەتىندە مەملەكەتتىك قىزمەتتىڭ جاڭا مانساپ مودەلى بەكىتىلدى. ەڭ بىلىكتى ءارى ساۋاتتى مامانداردى مەملەكەتتىك قىزمەتكە ىرىكتەۋدىڭ ءۇش ساتىلى جۇيەسى ەنگىزىلدى. كادرلار ءبىلىمى، تاجىريبەسى بويىنشا ىرىكتەپ الىنادى. مەملەكەتتىك اپپاراتتا جالاقىنى تەڭەستىرۋ مۇنان ارى بولمايدى. كىم جاقسى جۇمىس ىستەسە، سول مول جالاقى الادى»، - دەدى ق ر پرەزيدەنتى.
وسى رەتتە مەملەكەت باسشىسى «ب» اكىمشىلىك كورپۋسى ءۇشىن جالاقى كولەمى تاياۋدا عانا كوتەرىلگەندىگىن ەسكە سالىپ ءوتتى.
«مەملەكەتتىك قىزمەت ىستەرى جونىندەگى جاڭا مينيسترلىك جۇمىس ىستەۋدە. مەملەكەتتىك قىزمەتتەگى جەمقورلىق كورىنىستەرىنىڭ الدىنا جاڭا توسقاۋىلدار قويىلدى. قازاقستاننىڭ مەملەكەتتىك قىزمەت رەفورماسى اكىمشىلىك مەملەكەتتىك قىزمەتكەرلەردى قايتا اتتەستاتسيادان وتكىزۋمەن بايلانىستى شەشۋشى كەزەڭگە ءوتتى»، - دەدى ق ر پرەزيدەنتى.
نۇرسۇلتان نازاربايەۆ سالىق جانە كەدەن كودەكسىن قابىلداۋدى تاپسىردى.
«التىنشى شاقىرىلىمداعى پارلامەنتتىڭ الدىندا ءبىرقاتار ماڭىزدى زاڭنامالىق مىندەتتەردى شەشۋ ماسەلەسى تۇر. ەڭ ءبىرىنشى كەزەكتە ءبىرىڭعاي سالىق جانە كەدەن كودەكسىن قابىلداۋ قاجەت. ول قۇجاتتار بارلىق فيسكالدى پروتسەدۋرالاردى قامتاماسىز ەتەتىن بولۋى ءتيىس»، - دەدى ن. نازاربايەۆ.
اۆتور: قانات مامەتقازى ۇلى
