قازاقستان قارۋلى كۇشتەرى وفيتسەرلەرى افريكادا - فوتو

استانا. قازاقپارات - باتىس ساحاراسى مەن كوت- ديۆۋارداعى جەر ءۇستى جانە اۋەدەن پاترۋلدەۋ، تۇنگى باقىلاۋ بەكەتىن ۇيىمداستىرۋ، ۇيرەنشىكسىز كليمات پەن جوعارى تەمپەراتۋرالىق رەجىمدەر قازاقستان قارۋلى كۇشتەرى وفيتسەرلەرىنىڭ قاتىسۋىمەن ب ۇ ۇ- نىڭ بىتىمگەرشىلىك ميسسيالارى جالعاسۋدا،

 دەپ حابارلايدى ق ر قورعانىس مينيسترلىگىنىڭ باسپا ءسوز قىزمەتى.

 30 دان اسا ەلدىڭ وكىلدەرىمەن بىرلەسىپ اسكەري قىزمەتشىلەرىمىز اسكەري باقىلاۋشىلاردىڭ مىندەتتەمەلەرىن ورىنداۋدا. اسكەري قىزمەتشىلەردىڭ سوزىنە قاراعاندا، ميسسيالارداعى قيىندىقتار تەك قانا كليماتپەن بايلانىستى. ءشول دالاداعى قاپىرىق، باعدارلار، جوعارى تەمپەراتۋرالىق رەجىمدەر - مۇنىڭ بارلىعى كەي كەزدە پاترۋلدەۋگە قيىندىق تۋعىزادى. نەگىزگى تاپسىرمامەن، ياكي، بەلگىلەنگەن جاۋاپكەرشىلىك ايماقتارىن پاترۋلدەۋمەن قاتار، ولار الىنعان اقپاراتتى جيناۋ جانە تالداۋمەن اينالىسادى، اسكەري ۋاعدالاستىقتى ساقتاۋ مونيتورينگىسىن جۇرگىزەدى. ق ر  ق ك باس شتابى جاۋىنگەرلىك دايارلىق دەپارتامەنتىندە ايتقانداي، بۇگىندە باتىس ساحاراسى (MINURSO) مەن كوت- ديۆۋارداعى (UNOCI) ب ۇ ۇ- نىڭ بىتىمگەرشىلىك ميسسيالارىندا جەتى قازاقستاندىق وفيتسەر بار.

 شىن مانىندە سانى بويىنشا بۇكىل الەمدە قاۋىپسىزدىكتى قامتاماسىز ەتۋدە سۇبەلى ۇلەس قوسىپ جۇرگەن اسكەري قىزمەتشىلەردىڭ ازعانتاي عانا كونتينگەنتى. اسكەري باقىلاۋشىلار ب ۇ ۇ- نىڭ پەرسونالى بولىپ تابىلادى. ولار داۋ- داماي شىعارۋشى بىردە- ءبىر تاراپتى قولداماي، بەيتاراپتىلىق قاعيداتىن ۇستانادى، قول جەتكىزىلگەن بەيبىت ۋاعدالاستىقتىڭ ساقتالۋىن قاداعالايدى. سونىمەن بىرگە، ميسسيا بارىسىندا جيناقتالاتىن تاجىريبە دە اسا قۇندى.

ميسسيادان ميسسياعا ول ءارتۇرلى ەلدەر مەن الەمنىڭ تۇكپىر- تۇكپىرىنەن اسكەري باقىلاۋشىلارمەن بەرىلەدى. شەتەلدىك ارىپتەستەرىنىڭ تاجىريبەسىن الا وتىرىپ، وفيتسەرلەرىمىز ورالعاننان كەيىن ءوز ويلارىمەن ءبولىسىپ، ارميامىزعا ەنگىزەدى.