رەجيسسەر تالعات تەمەنوۆ جاس دراماتۋرگتەر نەلىكتەن از ەكەنىن ءتۇسىندىردى
بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ كوركەمدىك جەتەكشىسى تالعات تەمەنوۆ وسىلاي ءمالىم ەتتى.
«وكىنىشتىسى، بۇگىندە 30 جاسقا دەيىن دۇرىلدەپ شىققان جاس دراماتۋرگتەر جوقتىڭ قاسى. سەبەبى، پەساعا تولەنەتىن قالاماقى باسقا سالالاردان الدەقايدا از. مىسالى، كەڭەستىك كەزەڭدە ءاربىر پەساعا بەرىلەتىن قالاماقى ءبىر ماشينانىڭ قۇنى بولاتىن. بۇگىندە از تولەنەدى»، - دەپ توقتالدى تالعات تەمەنوۆ.
ونىڭ سوزىنە قاراعاندا، قازىرگى كەزدە جاس دارىندار ايلاپ وتىرىپ پەسا جازىپ، تيىن-تەبەن العانشا، باسقا باعىتتاردا باقتارىن سىناعاندى ءجون كورەدى.
«ءبىر كليپكە ءۇش بەتتىك سەناري جازسا، وعان 10 مىڭ ا ق ش دوللارىنا دەيىن الادى. سوندىقتان وسى ماسەلە ءالى دە شەشىمىن تاپپاي ءجۇر. ارينە، ت. جۇرگەنوۆ اتىنداعى قازاق ۇلتتىق ونەر اكادەمياسىندا، استاناداعى قازاق ۇلتتىق ونەر ۋنيۆەرسيتەتىندە دراماتۋرگتەردى دايىندايتىن ماماندىقتار بار. بۇل وقۋ ورىندارىندا ءمۇيىزى قاراعايداي دراماتۋرگتەر ساباق بەرەدى. ءبىراق، سول دراماتۋرگتەردىڭ ساحناعا پەسا اكەلىپ، قويىپ جاتقاندارى ساۋساقپەن سانارلىق. ارينە، جاس تالانتتاردىڭ، جاس دراماتۋرگتەردىڭ، جاس رەجيسسەرلەردىڭ كەلگەنىن قالايمىز»، - دەدى ول.
بۇل رەتتە ت. تەمەنوۆ جاس تالانتتار نەگىزىنەن تەلەۆيزيا سالاسىنا قىزمەتكە باراتىنىن، وسى سالادا بۇگىندە كوپتەگەن جاقسى دراماتۋرگتەر جۇرگەنىن اتاپ ءوتتى.
اۆتور: رۋسلان عابباسوۆ
