بەسىنشى شاقىرىلىمداعى پارلامەنتتىڭ سوڭعى وتىرىسى وتۋدە

استانا. قازاقپارات - بۇگىن پارلامەنت سەناتىنىڭ بەسىنشى شاقىرىلىمىنىڭ بەسىنشى سەسسياسىنىڭ سوڭعى وتىرىسى وتۋدە.

ايتا كەتەيىك، كونستيتۋتسيالىق وكىلەتتىككە سايكەس، سەنات ءماجىلىس ۋاقىتشا بولماعان كەزەڭدە پارلامەنتتىڭ جۇمىسىن ءبىر ءوزى اتقارعان بولاتىن. وسى ۋاقىتتار ارالىعىندا داعدارىسقا قارسى كەشەندى شارالاردى جۇزەگە اسىرۋعا قاجەتتى 57 زاڭ جوباسىمەن تياناقتى جۇمىس جۇرگىزىلدى. زاڭ جوبالارىن تالقىلاۋ بارىسىندا سەناتورلار 1,5 مىڭنان استام تۇزەتۋلەر ەنگىزىپ، قابىلدانعان زاڭدار ساپاسىنىڭ دەڭگەيىن ايتارلىقتاي جوعارىلاتقان.

«پارلامەنتتىڭ بەسىنشى شاقىرىلىمى ەلىمىزدىڭ قوعامدىق ومىرىندە ايرىقشا ورىن الاتىن وقيعالارمەن تۇسپا- تۇس كەلگەنى دە بارشامىزعا بەلگىلى. ەلباسىنىڭ تىكەلەي باستاماسىمەن ەۋرازيالىق ەكونوميكالىق وداق ءوز جۇمىسىن باستاپ، ەلىمىز دۇنيەجۇزىلىك ساۋدا ۇيىمىنا مۇشە بولدى. قازاقستاننىڭ الەمدىك ەكونوميكاعا تەرەڭ ىقپالداسۋى جاعدايىندا ۇلتتىق زاڭنامانى جەتىلدىرۋ بويىنشا كەشەندى جۇمىستار جۇرگىزىلۋدە. «نۇرلى جول» باعدارلاماسىن ىسكە اسىرۋعا قاجەتتى قۇقىقتىق اكتىلەر قابىلداۋ پارلامەنتتىڭ كۇن تارتىبىندەگى باستى تاقىرىپقا اينالدى. ەلباسى ۇسىنعان «100 ناقتى قادام» ۇلت جوسپارىن ىسكە اسىرۋعا قاجەتتى زاڭدار قىسقا مەرزىم ىشىندە تالقىلىناپ، دەر كەزىندە قابىلداندى»، - دەدى جيىن بارىسىندا سەنات سپيكەرى قاسىم- جومارت توقايەۆ.

سپيكەر سەناتورلار مەن اپپارات قىزمەتكەرلەرىنە دە العىسىن جەتكىزدى. ونىڭ ايتۋىنشا، پارلامەنت زاڭ شىعارۋ ىسىمەن قاتار باسقا دا شارالارعا بەلسەندى ارالاسقان. «جالپى پارلامەنتتىڭ قىزمەتىنە ەلباسى جوعارى باعا بەرگەن بولاتىن. ءبىز مەملەكەت دامۋىنىڭ ماڭىزدى كەزەڭىنە ايقىن ماقساتپەن سەنىمدى قادام باستىق. ەلباسىنىڭ ەلىمىزدى كەشەندى جاڭعىرتۋعا باعىتتالعان رەفورمالارىن ودان ءارى تابىستى ىسكە اسىرۋعا بەلسەندى تۇردە قاتىسۋعا ءتيىسپىز»، - دەدى ق. توقايەۆ.

اۆتور: قانات مامەتقازى ۇلى