الەمدىك ەكسپورتتاۋشىلاردىڭ اراسىندا قازاقستاننىڭ ۇلەسى ءوسىپ كەلەدى
جالپى «قازاقستاندا جاسالعان» اتاۋىمەن قانداي تاۋارلار الەمدىك نارىققا شىعىپ جاتىر؟
دامەلى دۇيسەبەكوۆا، ماكارون فابريكاسىنىڭ شەبەرى:
- جۇمىسى تاڭسارىدەن باستالادى. مىندەتى - ماكارون ونىمدەرى دايىن بولعانشا ونىڭ بارلىق پروتسەستەن ءوتۋىن قاداعالاۋ. - بىزدە ءونىم توقتاۋسىز شىعارىلادى. كۇندىز- ءتۇنى اپپاراتتارىمىز قوسىلىپ تۇرادى. ناقتى ماكارونعا كەلەر بولساق، ونى شىعارۋعا 9 قۇرىلعى ارنالعان. ياعني بۇل 3 جەلى دەگەن ءسوز. ەگەر دە ۇلكەن كولەمدە تاپسىرىس تۇسسە، تەحنولوگيا ماماندارى بارلىق 3 جەلىدە جۇمىس ىستەيدى. ءبىر اۋىسىمدا 12 قىزمەتكەر بولادى. بۇعان قوسا ءبىر مەزەتتە 6 قۇرىلعىنى بىردەي قوسۋ مۇمكىندىگى دە بار. دايىن ءارى تولىقتاي كەپتىرىلگەن ونىمدەر وسى جەردە قالتالارعا سالىنادى. سودان سوڭ قويماعا جىبەرىلەدى.
ال ماماندار بولسا، ەڭ الدىمەن ساپاعا ءمان بەرەمىز دەيدى.
ناۋرىز ىدرىسوۆ، ينجەنەر- تەحنولوگ:
- بيداي ورتالىعىنان باستاپ، ونىڭ كونسەرنعا كەلىپ تۇسكەنگە دەيىنگى بارلىق پروتسەستى باقىلاۋدا ۇستايمىز. ياعني ساپاسى جوعارى داقىلدى تاڭداپ الامىز. ءاردايىم ءونىمنىڭ جاڭا تۇرلەرىن قوسىپ وتىرعاندىقتان، بىزدە ۇنەمى ىلگەرى جىلجۋ بار دەپ ايتا الامىن. فابريكا ماكاروننىڭ 20 ءتۇرىن شىعارادى. بۇعان قوسا ءتۇرلى جارما، قوسپا جەم، جارتىلاي دايىن تاڭعى اس تۇرلەرىن دە وندىرەدى.
سوندىقتان بولار قازاقستاندىق كاسىپورىننىڭ تاۋارلارىن شەتەلدىكتەر دە جاقسى بىلەدى. ماسەلەن، بىلتىر كونسەرن رەسەي مەن ورتالىق ازيا ەلدەرىنە شامامەن 26 مىڭ توننا ۇن مەن 1,5 مىڭ توننا ماكارون ءونىمىن ەكسپورتتاعان.
ستاتيستيكالىق مالىمەتتەرگە سۇيەنسەك، 2015 -جىلى قازاقستاندىق ءونىم ەكسپورتىنىڭ كورسەتكىشى ازداپ كەمىگەن. ارينە، بۇعان سەبەپ - جاھاندىق ەكونوميكانىڭ قازىرگى احۋالى. دەگەنمەن، Kaznex Invest ۇلتتىق اگەنتتىگىنىڭ ماماندارى جاقسى ءۇردىستىڭ قالىپتاسىپ كەلە جاتقانىن ايتۋدا. قازاقستاندا سوڭعى جىلدارى دايىن تاۋاردى ەكسپورتتاۋ كورسەتكىشى بىرتىندەپ ارتىپ كەلەدى ەكەن.
ناركەس الپىسبايەۆا، « Kaznex INVEST» ا ق ەكسپورتتى تالداۋ دەپارتامەنتىنىڭ ديرەكتورى:
- وسىدان بەس جىل بۇرىن شيكىزاتتى وڭدەۋ كولەمى 23 پايىز عانا بولدى. ال قازىر 77 پايىز. بۇگىندە تەمىر جول لوكوموتيۆتەرىن، دايىن كيىم- كەشەكتەردى، سارى فوسفوردى، باعدارشام مەن كاتريدجدەردى ەكسپورتتايمىز.
مۇنىڭ بارلىعى - قازاقستاننىڭ سوڭعى بەس جىلدا شىعارىپ جاتقان ونىمدەرى. وتكەن جىلدىڭ قورتىندىسى بويىنشا، ەلىمىزدە سىرتقى ساۋدا كولەمى 76 ميلليارد تەڭگەنى قۇراعان. ونىڭ 46 ميللياردى تىكەلەي ەكسپورتتىڭ ەنشىسىندە. قازاقستان بۇگىندە الەمنىڭ 117 ەلىنە ءونىم جونەلتەدى. شامامەن ونىڭ تەڭ جارتىسى شيكىزات كۇيىندە ەۋروپا ەلدەرىنە باعىتتالادى ەكەن. اتاپ ايتقاندا، كورشى ەلدەر بىزدەن اۆتوكولىكتەر، اۋىلشارۋاشىلىعى جابدىقتارى جانە ازىق- تۇلىك تۇرلەرىن الۋدا. ونىڭ ىشىندە قىتاي مەن ەۋرازيالىق ەكونوميكالىق وداققا مۇشە ەلدەر دە بار. سونىمەن قاتار ت م د ەلدەرى تاۋاردىڭ ءتۇر- تۇرىنەن جالپى كولەمى 6 پايىزدى قۇرايتىن ءونىم ساتىپ الىپ وتىر. وتاندىق تاۋارلاردىڭ قالعان 18 پايىزى الەمنىڭ وزگە دە مەملەكەتتەرىنە ساۋدالانادى.
وسىلايشا قازاقستان سوڭعى بەس جىلدا جاھاندىق ەكسپورتتاۋشىلار رەيتينگىندە 48-ورىننان 43-ورىنعا جوعارىلادى. ساراپشىلاردىڭ ايتۋىنشا، بۇل كورسەتكىشتى ودان ارى جاقسارتۋعا مۇمكىندىك بار. ول ءۇشىن شىعارىلاتىن ونىمدەردىڭ ۇلەسىن ارتتىرۋ كەرەك. الايدا بۇل رەتتە ساپالى تاۋار ۇسىناتىن كاسىپورىندارىمىز بولماسا، ماسەلەنىڭ شەشىلۋى ەكىتالاي. سوندىقتان وتاندىق ءونىم ءوندىرۋشى كاسىپورىندار سانىن دا، ساپاسىن دا ەسەلەۋ كەرەكدەيدى ماماندار. ال قازىرگى ۋاقىتتا ەلىمىزدە 1500 قازاقستاندىق كومپانيا عانا ونىمدەرىن وزگە ەلدەرگە ەكسپورتتاپ وتىر.
www.24.kz
