ادىلبەك نيازىمبەتوۆ: مەنىڭ ماقساتىم - ريو وليمپياداسىنىڭ چەمپيونى اتانۋ
وندا ول تاياۋدا قىتاي ەلىندە وتكىزىلەتىن ليسەنزيالىق تۋرنيرگە دايىندىق بارىسى جايىندا اڭگىمەلەدى.
- قارسىلاستارىڭىزدىڭ ىشىندە قايسىسىن ەرەكشە اتاپ وتەر ەدىڭىز؟
- بۇل تۋرنيردە ريو وليمپياداسىنىڭ جولدامالارى ساراپقا سالىنادى عوي. سوندىقتان، وعان قاتىساتىن سپورتشىلار بارىنشا دايىندالادى. مەنىڭشە، قارسىلاستاردىڭ بارلىعىنا بىردەي تىڭعىلىقتى دايىندالۋ قاجەت. ءبىزدى كۇردەلى دە جاۋاپتى سايىستار كۇتىپ تۇر.
- وسى سالماقتا ونەر كورسەتەتىن جاس بوكسشى ءالي احمەتوۆتى ءسىزدىڭ باستى باسەكەلەسىڭىزگە اينالدى دەۋگە بولادى...
- باسەكەلەستىك بۇل قاشاندا دامۋدىڭ بەلگىسى. ول جاڭا ماقساتتارعا قول جەتكىزۋگە ىنتالاندىرا تۇسەدى. مەنىڭشە، باسەكەلەستىك قازاقستان بوكسى ءۇشىن اۋاداي قاجەت. قازاقستان ۇلتتىق قۇراماسى ساپىندا ونەر كورسەتۋگە لايىقتى، جاس ءىزباسارلاردىڭ ءوسىپ كەلە جاتقانى مەنى قۋانتادى. نەگىزى، ءاربىر بوكسشىنىڭ قولايسىز قارسىلاسى بولادى ەمەس پە!؟ مەن ءۇشىن قولايسىز قارسىلاس وسى ءالي احمەتوۆ دەۋگە بولادى.
- قازاقستان ۇلتتىق قۇراماسى ساپىندا ونەر كورسەتە باستاعان جاس بوكسشى ابىلايحان جۇسىپوۆكە قانداي كەڭەستەر بەرەر ەدىڭىز؟
- ابىلايحان جاقسى مەكتەپتەن ءوتتى. كوپتەگەن حالىقارالىق تۋرنيرلەرگە قاتىسىپ، تاجىريبە جيناقتادى. ونىڭ الەۋەتى جوعارى. ءبىز ءوز كەزەگىمىزدە وعان جان- جاقتى قولداۋ، كومەك كورسەتۋگە تىرىسىپ جاتىرمىز.
- الداعى ريو وليمپياداسى جايىندا نە ايتار ەدىڭىز؟ الدىڭىزعا قانداي ماقسات قويدىڭىز؟
- وليمپيادا بۇل - ايتۋلى ۋاقيعا. ەرەكشە جارىس. بۇل جەردە جەتىستىك كوپتەگەن فاكتورلاردان قۇرالادى. سولار ءوزارا ۇيلەسىم تاپقاندا جەتىستىك تە بولادى. مەنىڭ ارمانىم دا ماقساتىم دا - ريو وليمپياداسىنىڭ التىن جۇلدەسىنە قول جەتكىزۋ. وليمپيادادان كەيىنگى سپورتتىق مانسابىمنىڭ قالاي جالعاساتىنى بەلگىسىز. ءبىراق، قازىر بارلىق كۇش- جىگەرىمدى جۇمىلدىرىپ وتىرعان ماقسات - ول، وليمپيادادا جەڭىس تۇعىرىنا كوتەرىلىپ، ەلىمىزدىڭ كوك بايراعىن جەلبىرەتۋ.
اۆتور: ايبوتا جاپپاربەرگەن
