فۋتزال: قازاقستان قۇراماسى سىرت الاڭدا پولشامەن تەڭ وينادى

استانا. قازاقپارات - فۋتزالدان 2016 - جىلعى الەم چەمپيوناتىنا بەرىلەر جولداما ءۇشىن ءبىرىنشى ويىندا قازاقستان قۇراماسى پولشامەن تەڭ وينادى.

تىكەلەي سپورتتىق كورسەتىلىم ارقىلى ءمالىم بولعانىنداي، 4-مينۋتتا لەونىڭ پاسىنان كەيىن قازاقستاندىق سەرىك جامانقۇلوۆ ەسەپ اشتى.

 الما- كەزەك شابۋىلمەن وربىگەن ماتچ بارىسىندا وسى ەسەپ كوپكە دەيىن وزگەرگەن جوق. ەكى كوماندا دا ءبىراز مۇمكىندىكتى ءمۇلت جىبەردى. دەگەنمەن ويىن بىتۋگە 27 سەكۋند قالعاندا، الاڭ يەلەرى تارازى باسىن تەڭەستىرىپ كەتتى. ەندى بارلىق ماسەلە 12 -ءساۋىر كۇنى الماتىدا وتەتىن قارىمتا كەزدەسۋدە شەشىلەدى.

ايتا كەتەيىك، الەم چەمپيوناتىنىڭ فينالدىق كەزەڭى 10 - قىركۇيەك - 2 - قازان ارالىعىندا كولۋمبيادا وتەدى. وعان ۇزدىك 24 كوماندا قاتىسادى. بيىل فۋتزالدان ەۋروپا چەمپيوناتىنا تۇڭعىش رەت قاتىسقان قازاقستان قۇراماسى بىردەن قولا جۇلدەگەر اتانعانى بەلگىلى.

اۆتور: ەلجان ەرالى