قازاق ەلى سايلاۋ ارقىلى جاھاندىق داعدارىسقا مەيلىنشە ءمان بەرىپ وتىرعانىن كورسەتتى - ن. دجافاروۆ
بۇگىن پارلامەنت ءماجىلىسى مەن ءماسليحات دەپۋتاتتارىنىڭ سايلاۋىنا ارنالعان بريفينگتە حالىقارالىق بايقاۋشى، ازەربايجان ميللي مەدجيليس دەپۋتاتى نيزامي دجافاروۆ وسىلاي ءمالىم ەتتى.
«ءبىز بايقاۋشىلىق جاساعان تۇركپا ميسسياسى قازاقستانداعى سايلاۋ ۇدەرىسىنە وتە قاناعاتتانۋشىلىق تانىتادى. بىزگە سايلاۋدىڭ بارىسىنا قاتىستى الدىن الا مالىمەتتەرمەن تانىسۋعا ۇلكەن جاعدايلار جاسالدى. سونىڭ ارقاسىندا كەزەكتەن تىس سايلاۋدىڭ ءوتۋ فيلوسوفياسىن دا زەردەلەۋگە مۇمكىندىك الدىق. ويتكەنى، ءقازىر الەمدە دە، قازاقستاندا دا ەكونوميكالىق، ساياسي كۇردەلى ماسەلەلەر ورىن الۋدا. وسى تۇرعىدان العاندا قازاق ەلى سايلاۋ ارقىلى وسىناۋ جاھاندىق ۇدەرىسكە مەيلىنشە ءمان بەرىپ وتىرعانىن تانىتتى. بۇل قازاقستاننىڭ ءارقاشان الدا بولۋ يدەياسىن بىلدىرەدى»، - دەدى ن. دجافاروۆ.
سونىمەن قاتار، قازاقستاننىڭ تاۋەلسىزدىگىنە 25 جىل تولعانىن ايتا كەلە، ساراپشى وسى جىلدار ىشىندە ەلىمىز جان-جاقتى تاجىريبە جيناقتاعانىن، سونىڭ ىشىندە سايلاۋ وتكىزۋ ۇدەرىسىندە دە ۇلكەن تاجىريبەگە يە بولعانىن اتاپ ءوتتى.
«ءبىز بايقاعان ۋچاسكەلەردىڭ ءبارى جوعارى حالىقارالىق دەڭگەيگە ساي بولدى. بۇل ءۇشىن قىزىعامىز. ەندى وسى سايلاۋدىڭ ناتيجەسى قازاقستاننىڭ وركەندەۋى ءۇشىن جاعىمدى بولاتىنىنا سەنەمىن»، - دەدى ازەربايجان دەپۋتاتى.
اۆتور: قانات مامەتقازى ۇلى
