نۇرسۇلتان نازاربايەۆ قازاقستان حالقىن ۇلىستىڭ ۇلى كۇنىمەن قۇتتىقتادى - فوتو
«ءاز-ناۋرىز بارشا حالقىمىزعا قۇتتى بولسىن! وسى جەرگە جينالعان حالىققا، بارلىق قازاقستاندىقتارعا شىن جۇرەگىممەن باق- بەرەكە تىلەيمىن. ۇلىستىڭ ۇلى كۇنى كەشەگى سايلاۋداعى ۇلى جەڭىسىمىزبەن قاتار كەلدى. سوندىقتان قازاقستان حالقى ءبىر ءۇيدىڭ بالاسىنداي امان- ەسەن ءجۇرىپ جاتقان جاعدايىمىز بار. وسى بىرلىكتەن جاراتقان ءبىزدى ءار ۋاقىتتا اجىراتپاسىن. بارلىق ىستەپ جاتقان جۇمىس - كەلەر ۇرپاقتىڭ قامى. كەلەر ۇرپاققا بەرەتىن اماناتىمىز ەلدىڭ بىرلىگىن ساقتاپ، تاۋەلسىزدىگىمىزدى كوزدىڭ قاراشىعىنداي قورعاپ، بولاشاققا جول سالاتىن بولسىن»، - دەدى پرەزيدەنت.
وسى ورايدا ەلباسى قازاقستان تىنىشتىق جاعدايىندا وركەندەپ ءوسىپ جاتقاندىعىن اتاپ ءوتتى.
«وسى كۇنى ادامدار ءبىر- بىرىنە قانداي دا ءبىر رەنىشتەرىن كەشىرىپ، كوشەت وتىرعىزىپ، بۇلاقتاردىڭ كوزىن اشقان، مۇقتاجدار مەن كەدەيلەرگە كومەك كورسەتكەن. سونىمەن قاتار مەيىرىمدىلىككە شاقىرىپ، جاقسى تىلەكتەر ايتقان. مەن بارشامىزعا اماندىق، ءار وتباسىعا، ءار ادامعا باقىت پەن بارلىق جاقسىلىقتى تىلەيمىن»، - دەدى مەملەكەت باسشىسى.
ايتا كەتەيىك، قازىرگى ۋاقىتتا «استانا ارەنا» ماڭىنداعى الاڭدا ورنالاسقان ەتنواۋىلدا ەلوردا تۇرعىندارى مەن قالا قوناقتارى نازارىنا كونتسەرتتىك باعدارلاما ۇسىنىلىپ، سپورتتىق جارىستار ءوتىپ جاتىر. وسىندا «تۇساۋ كەسەر»، «بەسىككە سالۋ»، «سىرعا سالۋ»، «قىز ۇزاتۋ»، «قۇدا ءتۇسۋ» سالت- ءداستۇرى كورسەتىلدى، سونداي-اق «توعىز قۇمالاق» جانە باسقا ۇلتتىق ويىنداردان سايىس ءوتتى.
اۆتور: رۋسلان عابباسوۆ
