ەلباسى ەلوردادا ناۋرىزعا ارنالعان مەرەكەلىك شارانى تاماشالادى

استانا. قازاقپارات - ەلباسى نۇرسۇلتان نازاربايەۆ ەلوردادا ناۋرىز تويلانىپ جاتقان الاڭعا كەلىپ، حالىقپەن بىرگە وسىندا مەيرامدىق كورىنىستەردى تاماشالادى.

قازىرگى ۋاقىتتا «استانا ارەنا» ماڭىنداعى الاڭدا ورنالاسقان ەتنواۋىلدا ەلوردا تۇرعىندارى مەن قالا قوناقتارى نازارىنا كونسەرتتىك باعدارلاما ۇسىنىلىپ، سپورتتىق جارىستار ءوتىپ جاتىر. تايقازان جانىندا تەاترلاندىرىلعان قويىلىم كورسەتىلىپ، جينالعان جۇرتشىلىق «ناۋرىز كوجەنىڭ» ءدامىن تاتتى.

وسىندا «تۇساۋ كەسەر»، «بەسىككە سالۋ»، «سىرعا سالۋ»، «قىز ۇزاتۋ»، «قۇدا ءتۇسۋ» سالت-ءداستۇرى كورسەتىلدى، سونداي-اق «توعىز قۇمالاق» جانە باسقا ۇلتتىق ويىنداردان سايىس ءوتتى.

سپورت الاڭىندا جينالعان قاۋىم قازاقشا كۇرەستەن، ارقان تارتۋ، گىر سپورتى جانە ارمرەستلينگ جارىستارىنا قاتىستى.

مۇنىمەن قوسا، شىعىس بازارىندا شەبەرلەر قىشتان جاسالعان بۇيىمداردى، زەرگەرلىك، كيىزدەن، اعاشتان جاسالعان ونىمدەرىن كوپشىلىك نازارىنا ۇسىندى. ورناتىلعان التىباقانداردا قىز-جىگىتتەر اراسىندا ءان- ايتىس ۇيىمداستىرىلدى.

اۆتور: رۋسلان عابباسوۆ