قازاقستان حالقى بىزدەن دە كۇشتى حالىق - ا ق ش ساراپشىسى

استانا. قازاقپارات - قازاقستان حالقى بىزدەن دە كۇشتى حالىق. بۇگىن پارلامەنت ءماجىلىسى مەن ءماسليحات دەپۋتاتتارىنىڭ سايلاۋىنا ارنالعان بريفينگتە حالىقارالىق بايقاۋشى، حالىقارالىق سالىق جانە ينۆەستيتسيا ورتالىعىنىڭ پرەزيدەنتى (ا ق ش) دانيەل الان ۆيتت وسىنداي پىكىر ءبىلدىردى.

بريفينگ بارىسىندا قازاقستاننىڭ ەكونوميكالىق رەفورمالارىنا، ەلدىڭ باسەكەگە قابىلەتتىلىگىنە توقتالعان ساراپشى بۇل باعىتتاعى جۇمىستار ءالى اياقتالماعانىن دا اتاپ ءوتتى.

«قازىر بۇكىل الەمدە وزگەرىستەر ءجۇرىپ جاتىر. قازاقستاننىڭ سايلاۋشىسى دا، امەريكانىڭ سايلاۋشىسى دا، قىتايدىڭ سايلاۋشىسى دا قازىر ەكونوميكالىق كليمات تۋرالى اڭگىمە بولعاندا كوبىرەك قوبالجيدى. ويتكەنى، الەمدە بەلگىلى ءبىر قاۋىپ-قاتەرلەر بارشىلىق. دەگەنمەن، مەنىڭ ويىمشا، قازاقستان حالقى - بىزگە قاراعاندا كۇشتى حالىق. ماسەلەن، تاۋەلسىزدىك العاندا قازاقستان كۇردەلى كەزەڭدى باستان كەشىردى: ەكونوميكالىق ءوسىم قۇلدىراپ كەتتى. ال قازىرگى جاعداي قالاي؟» - دەدى د. الان ۆيتت.

«بىزگە قازىرگى الەمدىك نارىقتاعى مۇنايعا باعا، شيكىزات باعالارى مۇلدەم ۇنامايدى. الايدا، ن. نازاربايەۆ ءوزىنىڭ ە ا ە و- داعى ارىپتەستەرىنە بىرنەشە جىل بۇرىن ايتقانىنداي - بۇل ەرەكشە مۇمكىندىك. بۇل دامۋ ءۇشىن مۇمكىندىك، وسى ارقىلى قازاقستان باسەكەگە قابىلەتتى بولۋدا شىڭدالادى»، - دەدى الان ۆيتت.

سونىمەن قاتار، ساراپشى قازاقستاننىڭ مەملەكەتتىك اپپاراتىندا دا اۋقىمدى جۇمىستار كۇتىپ وتىرعانىن العا تارتتى. «ن. نازاربايەۆتىڭ «قازاقستان-2050» ستراتەگياسىن كوپتەگەن ساراپشىلار قولدايدى. قازاقستان ەىدۇ مۇشەلىككە ەنۋگە ۇمتىلۋدا. وسىنىڭ ءبارى «نۇر وتان» پارتياسىنا 80 پايىزدان استام داۋىىس بەرۋگە سەبەپ بولدى. ەندى «نۇر وتان» پارتياسى مەملەكەتتىك اپپارات ارقىلى ن. نازاربايەۆ بەلگىلەگەن باعدارلامانى جۇزەگە اسىرۋعا كۇش سالادى دەپ ويلايمىن»، - دەدى ساراپشى.

اۆتور: قانات مامەتقازى ۇلى