سايلاۋ پروتسەسى بارىسىنا قاتىستى شاعىمدار مەن ەسكەرتۋلەر تۇسكەن جوق
بۇل تۋرالى بۇگىن تاجىكستان رەسپۋبليكاسى ورتالىق سايلاۋ جانە رەفەرەندۋمدار كوميسسياسىنىڭ حاتشىسى مۋيستون ازيزوۆا ايتتى.
«سايلاۋ ناۋقانىنا مونيتورينگ جۇرگىزۋ ءۇشىن قاجەتتى بارلىق جاعداي جاسالعان. داۋىس بەرۋ كۇنىندە ءبىز سايلاۋ ۋچاسكەلەرى ءوز جۇمىستارىن باستاماي تۇرعان كەزدە ەرتە بارىپ، داۋىس بەرۋگە ارنالعان جاشىكتەردى ورنالاستىرۋ ءساتىن باقىلادىق. 20 عا جۋىق سايلاۋ ۋچاسكەسىندە بولساق، سونىڭ بارلىعىندا دا دايىندىق جۇمىستارى تىڭعىلىقتى جۇرگىزىلگەن»، - دەدى ول.
سونىمەن قاتار ول داۋىس بەرۋ بارىسىندا قازاقستان ازاماتتارى بارىنشا بەلسەندىلىك تانىتقاندىعىن ايرىقشا اتاپ ءوتتى.
«ۋچاسكەلىك سايلاۋ كوميسسيالارىنىڭ جۇمىستارى قازاقستاننىڭ سايلاۋ زاڭناماسى تالاپتارىنا سايكەس جۇرگىزىلدى. ءبىز بارىپ كورگەن سايلاۋ ۋچاسكەلەرىنىڭ بارلىعىندا دا ساياسي پارتيالاردىڭ، قوعامدىق بىرلەستىكتەردىڭ جانە ۇكىمەتتىك ەمەس ۇيىمداردىڭ وكىلدەرى بولدى. تمد ميسسياسىنا سايلاۋ پروتسەسى بارىسىنا قاتىستى شاعىمدار مەن ەسكەرتۋلەر تۇسكەن جوق»، - دەدى م. ازيزوۆا.
ەستەرىڭىزگە سالا كەتەيىك، كەشە ەلىمىزدە ق ر پارلامەنتى ءماجىلىسى مەن بارلىق دەڭگەيدەگى ءماسليحات دەپۋتاتتارىنىڭ سايلاۋى ءوتتى. ق ر و س ك دەرەكتەرىنە سايكەس، وبلىستىق، استانا جانە الماتى قالالارىنىڭ سايلاۋ كوميسسيالارىنان كەلىپ تۇسكەن حابارلار بويىنشا تىزىمگە ەنگىزىلگەن 9 ميلليون 810 مىڭ 920 سايلاۋشىنىڭ 7 ميلليون 564 مىڭ 281 ى سايلاۋ بيۋللەتەندەرىن الدى. الدىن الا اقپاراتقا سايكەس، رەسپۋبليكا بويىنشا تىزىمگە ەنگىزىلگەن بارلىق سايلاۋشىلاردىڭ 77,1 پايىزى داۋىس بەرۋگە قاتىستى. وتكەن سايلاۋلاردىڭ دەرەكتەرىمەن سالىستىرعاندا، بۇل - رەكوردتىق كورسەتكىش.
اۆتور: مارلان جيەمباي
