ەلوردالىق ەتنومادەني بىرلەستىكتەردىڭ ءتوراعالارى سايلاۋدا داۋىس بەردى

استانا. قازاقپارات - ەلوردالىق ەتنومادەني بىرلەستىكتەردىڭ ءتوراعالارى ق ر پارلامەنتى ءماجىلىسى مەن استانا قالاسى ءماسليحاتى دەپۋتاتتارىن سايلاۋعا قاتىستى، دەپ حابارلايدى قالا اكىمدىگىنىڭ رەسمي سايتى.

ق ر ارميان دياسپوراسىنىڭ وكىلى، «ۆان» ەتنومادەني ورتالىعىنىڭ حاتشىسى سااك سالۋميان العاشقىلاردىڭ ءبىرى بولىپ №51 -سايلاۋ ۋچاسكەسىندە داۋىس بەردى.

- مەملەكەتىمىزدى جانە پرەزيدەنتىمىزدى تولىعىمەن قولدايمىن. ۇلى ناۋرىز مەيرامى قارساڭىندا ەرتەڭگى كۇنگە سەنىمدى قادام باسىپ، ءارقاشان دا تەك العا عانا جىلجۋ ءۇشىن قازاقستان حالقى ءوز تاڭداۋىن جاساماق. دۇرىس تاڭداۋ جاساعانىما سەنىمدىمىن، - دەپ ءبولىستى ءوز پىكىرىمەن سااك سالۋميان.

«دوستىق» وزبەك ەتنومادەني ورتالىعىنىڭ ءتوراعاسى حاسان ءشارىپوۆ №17 -مەكتەپ عيماراتىنداعى № 92 سايلاۋ ۋچاسكەسىندە داۋىس بەردى.

- ءبارىمىز ءۇشىن اسا ماڭىزدى وقيعا - سايلاۋعا بۇكىل وتباسىمىزبەن كەلدىك. قازاقستاننىڭ بولاشاعى، بىرلىك پەن ىنتىماق ءۇشىن داۋىس بەردىك، - دەدى حاسان ءشارىپوۆ. ول ءماجىلىستىڭ كەزەكتەن تىس سايلاۋىن وتكىزۋ الەمدە قالىپتاسقان ەكونوميكالىق جاعدايعا بايلانىستى دۇرىس قابىلدانعان شەشىم ەكەندىگىن اتاپ ءوتتى.

«پولياكتار» قوعامدىق بىرلەستىگىنىڭ ءتورايىمى ەلەنا روگوۆسكايا ەلىمىزدەگى ۇلكەن ساياسي وقيعانى قولداپ، ءوز تاڭداۋىڭدى جاساۋ ماڭىزدى دەپ سانايدى.

- مەملەكەتكە جاڭا سەرپىن قاجەت، پارلامەنت ءماجىلىسى مەن بارلىق دەڭگەيلەردەگى ءماسليحاتتىڭ جاڭارتىلعان قۇرامى ەكونوميكامىزدى مودەرنيزاتسيالايدى. ءبىزدىڭ قوعام دۇرىس جولمەن كەلەدى، ادامدار ۇلكەن وزگەرىستەردى كۇتۋدە، سايلاۋعا دا شىن نيەتپەن كەلىپ جاتىر.

№8 -سايلاۋ ۋچاسكەسىندە كىسى كوپ بولدى، داۋىس بەرۋ ءۇشىن كەزەكتە تۇرۋعا تۋرا كەلدى، - دەيدى ەلەنا روگوۆسكايا.

ايتا كەتەيىك، ەرتەڭ قازاقستان حالقى اسسامبلەياسى اتىنان كانديداتتاردى سايلاۋ وتەدى.