سايلاۋ كوميسسيالارى داۋىستاردى ساناۋعا كىرىستى - ق ر و س ك

استانا. قازاقپارات - ەلىمىزدىڭ ۋچاسكەلىك سايلاۋ كوميسسيالارىنىڭ مۇشەلەرى سايلاۋشىلاردىڭ داۋىستارىن ساناۋعا كىرىستى.

بۇل تۋرالى بۇگىن ق ر ورتالىق سايلاۋ كوميسسياسىنىڭ حاتشىسى باقىت مەلدەشوۆ ءمالىم ەتتى.

«ەلىمىزدىڭ وڭىرلەرىندە قر پارلامەنتى ءماجىلىسى مەن ءماسليحاتتارى دەپۋتاتتارىنا داۋىس بەرۋ اياقتالدى. قازىرگى ۋاقىتتا ۋچاسكەلىك سايلاۋ كوميسسيالارىنىڭ مۇشەلەرى سايلاۋشىلاردىڭ داۋىستارىن ساناۋعا كىرىستى»، - دەدى ق ر و س ك حاتشىسى.

ب. مەلدەشوۆتىڭ اتاپ وتۋىنشە، قازاقستاننىڭ سايلاۋ زاڭناماسىنا سايكەس ءاربىر ساياسي پارتيا مەن ءاربىر كانديدات ءۇشىن داۋىستار جەكە-جەكە سانالاتىن بولادى.

«ۋچاسكەدەگى داۋىستاردى ساناۋ ۋاقىتى ساناۋ باستالعان ساتتەن 12 ساعاتتان اسپاۋى ءتيىس. باتىس وڭىرلەردە، اتاپ ايتقاندا، ماڭعىستاۋ، اتىراۋ، اقتوبە، باتىس قازاقستان وبلىستارىندا ۋاقىت ايىرماشىلىعىنا بايلانىستى داۋىس بەرۋ ەندى عانا اياقتالدى. بۇعان قوسا، شەتەلدەگى 65 ۋچاسكەنىڭ 47-سىندە داۋىس بەرۋ جالعاسۋدا»، - دەدى ب. مەلدەشوۆ.

ايتا كەتەرلىگى، سايلاۋشىلاردىڭ داۋىس بەرۋگە كەلۋى جايىنداعى الدىن الا مالىمەتتەر استانا ۋاقىتى بويىنشا ساعات 22.30 دا جاريا ەتىلەدى.

اۆتور: كەنجەكەي توقتامۇرات قىزى