باس پروكۋراتۋرا: زاڭ بۇزعان ۋچاسكەلىك سايلاۋ كوميسسياسىنىڭ ءتوراعاسى قىزمەتىنەن بوساتىلدى
بۇل تۋرالى بۇگىن ق ر ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ق ر باس پروكۋراتۋراسىنىڭ رەسمي وكىلى نۇرداۋلەت سۇيىندىكوۆ ءمالىم ەتتى.
ونىڭ ايتۋىنشا، ەلەكتورالدىق كەزەڭدە ازاماتتاردىڭ كونستيتۋتسيالىق قۇقىقتارى مەن سايلاۋ زاڭناماسىنىڭ ساقتالۋ ماسەلەلەرى پروكۋرورلار ءۇشىن جۇمىستىڭ نەگىزگى باسىمدىعى بولىپ بەلگىلەنگەن.
«ۇگىتتى قوسا العاندا، داۋىس بەرىلەتىن كۇننىڭ الدىنداعى بارلىق ءىس- شارالار «قازاقستان رەسپۋبليكاسىنىڭ سايلاۋ تۋرالى» كونستيتۋتسيالىق زاڭعا سايكەس جۇرگىزىلگەندىگىن اتاپ وتەمىز. مەملەكەتتىك ورگاندار تاراپىنان قانداي دا ءبىر زاڭ بۇزۋشىلىقتار انىقتالعان جوق. دەگەنمەن، كەي جاعدايدا سايلاۋ الدىنداعى ۇگىتتى جۇرگىزۋ شارتتارى بۇزىلدى. ناقتى ايتقاندا، شىعىس قازاقستان وبلىسىنىڭ زىريان اۋدانىندا پروكۋراتۋرا ۋچاسكەلىك سايلاۋ كوميسسياسىنىڭ ءتوراعاسىنا قاتىستى ءماسليحات دەپۋتاتتىعىنا كانديداتتاردىڭ ءبىرىن قولداپ، سايلاۋ الدىندا ۇگىت جۇرگىزگەنى ءۇشىن اكىمشىلىك ءىس قوزعادى. وسىعان بايلانىستى ول كوميسسيا ءتوراعاسىنىڭ مىندەتىن اتقارۋدان بوساتىلدى. سونداي- اق، سوت 30 ايلىق ەسەپتىك كورسەتكىش مولشەرىندە ايىپپۇل تۇرىندە اكىمشىلىك جاۋاپكەرشىلىككە كەستى» ، دەدى ن. سۇيىندىكوۆ.
ونىڭ ايتۋىنشا، شىمكەنت قالاسىنىڭ قاراتال اۋدانىندا قالالىق ءماسليحات دەپۋتاتتىعىنا كانديداتتىڭ ۇگىت ماتەريالدارىن بۇلدىرگەنى ءۇشىن قالا تۇرعىنى اكىمشىلىك جاۋاپكەرشىلىككە تارتىلعان. سونداي- اق، سايلاۋالدى ۇگىتتى جۇرگىزۋ شارتتارىن بۇزۋ فاكتىلەرى بويىنشا استانانىڭ 3 تۇرعىنىنا زاڭدى بۇزۋعا جول بەرىلمەيتىندىگى تۋرالى الدىن الا ەسكەرتۋلەر جاسالىپتى.
