رەسەيلىك بايقاۋشىنى سايلاۋعا كەلگەن حالىقتىڭ قالىڭ ءنوپىرى تاڭقالدىردى

استانا. قازاقپارات - رەسەي بايقاۋشىسى، ر ف مەملەكەتتىك دۋماسى ءتوراعاسىنىڭ ورىنباسارى، ۇ ق ش ۇ پ ا وكىلى ۆلاديمير ۆاسيلەۆتى ق ر پارلامەنتى ءماجىلىسىنىڭ دەپۋتاتتارىن سايلاۋعا كەلگەن حالىقتىڭ كوپتىگى تاڭقالدىردى.

بۇل تۋرالى ول بۇگىن استانادا وتكەن باسپا ءسوز ءماسليحاتىندا ءمالىم ەتتى.

«سايلاۋ جاقسى ءوتىپ جاتىر. حالىققا باستى كونستيتۋتسيالىق مىندەتتەرىن ورىنداۋعا بارلىق جاعدايلار جاسالعان. ءبىز سايلاۋ باستالماي جاتىپ، 7 سايلاۋ ۋچاسكەسىندە بولدىق. بارلىق جاعدايلار قامتاماسىز ەتىلگەن. مەن جانە وزگە دە شەتەلدىك بايقاۋشىلار ەشبىر زاڭبۇزۋشىلىقتى انىقتاعان جوقپىز»، - دەدى ۆ. ۆاسيليەۆ.

ول سونىمەن قاتار قازاقستان حالقىنىڭ سايلاۋداعى بەلسەندىلىگىنە دە جوعارى باعا بەرە كەتتى.

«سايلاۋ ۋچاسكەسىنە كەلگەنىمىزدە، ونىڭ الدىندا داۋىس بەرۋگە نيەت تانىتقان حالىقتىڭ سانى وتە كوپ ەكەندىگىن كوردىك. مەنىڭ بارلىق ارىپتەستەرىم وسى ءبىر ەرەكشەلىك باسقا دا سايلاۋ ۋچاسكەلەرىندە بولعانىن اتاپ ءوتتى. ولاردىڭ ايتۋىنشا، بارلىق سايلاۋ ۋچاسكەلەرىندە تاڭعى 7 دەن باستاپ، ۇزىنسونار كەزەك تۇرعان»، - دەدى ول.

اۆتور: جاسۇلان جولدىبايەۆ