ن. نازاربايەۆ: بىزگە دەموكراتيانى تىقپالاي بەرۋدىڭ ەش قاجەتى جوق

استانا. قازاقپارات - قازاقستان پرەزيدەنتى نۇرسۇلتان نازاربايەۆ ەل ءۇشىن دەموكراتيا جولدىڭ باستاۋى ەمەس، ونىڭ اياقتالۋى بولىپ تابىلاتىندىعىن مالىمدەدى.

بۇل جايىندا ەلباسى بۇگىن پارلامەنتتىك سايلاۋدا داۋىس بەرگەننەن كەيىن وتكەن بريفينگ بارىسىندا امەريكاندىق جۋرناليستەردىڭ ساۋالىنا وراي ايتتى.

«ءاربىر جاس مەملەكەتتىڭ ءوز دامۋ كەزەڭى بار. امەريكا تاريحىنا 250 جىل بولىپ وتىر، ءبىراق ەل ءالى دە دامۋ ۇستىندە. ايەلدەر مەن فەرمەرلەر داۋىس بەرە الماعان، ناسىلدىك كەمسىتۋشىلىكتىڭ بولعان كەزى ەسىمىزدە. بۇل رەفورمالاردى سىزدەر ءوز مەملەكەتتىكتەرىڭىزدىڭ 150 جىلىنان كەيىن جۇرگىزدىڭىزدەر. ال بىزگە نە ءبارى 25 جىل عانا. سوندىقتان بولاشاقتا وزگەرۋ، دەموكراتيا ماسەلەسى - بۇل جولدىڭ باستالۋى ەمەس. بىزدەر ءۇشىن دەموكراتيا - بۇل جولدىڭ سوڭى. ءبىز ۇنەمى رەفورمالار جاساپ، زاڭدار قابىلدايمىز. بۇل باعىتتا ىلگەرىلەۋدەمىز. سوندىقتان دا ءبىزدى اسىقتىرۋدىڭ قاجەتى جوق. ويتكەنى ءبىز - باسقامىز. ازيادا باسقاشا وتباسىلىق قارىم-قاتىناس، باسقا ءدىن، ادامدار اراسىنداعى باسقا مۇمكىنشىلىكتەر. سول سەبەپتى بارلىق مەملەكەتتەرگە ءبىر-ءبىرىنىڭ ءداستۇرىن، تاريحى مەن مادەنيەتىن قۇرمەتتەۋگە ۇيرەنۋ قاجەت»، - دەپ اتاپ ءوتتى ق ر پرەزيدەنتى.

مەملەكەت باسشىسىنىڭ اتاپ وتۋىنشە، قازاقستان قارقىندى دامىپ، بارشا الەمگە كومەكتەسۋىن جالعاستىرۋعا، بەيبىتشىلىكتى جاقتاۋعا، حالىقتاردى جاقىنداستىرۋعا جانە يادرولىق قارۋسىزدانۋمەن كۇرەسۋىن جالعاستىرۋعا نيەتتى.

«اعىمداعى جىلى قازاقستان تاۋەلسىزدىگىنىڭ 25 جىلدىعىن اتاپ وتەتىن بولامىز. وسى جىلداردىڭ ىشىندە بىزدەر اۋقىمدى جۇمىستار جۇرگىزدىك. ەكونوميكا 21 ەسە ءوستى. حالىقتىڭ تابىسى 19 ەسە ارتتى. بۇگىندە قازاقستان ءۇشىنشى الەم مەملەكەتىنەن حالىقتىڭ جان باسىنا شاققانداعى تابىسى 13 مىڭ دوللاردى قۇرايتىن ورتاشا تابىستى ەلدەردىڭ قاتارىنا قوسىلدى. مەنىڭشە، بۇل وتە جاقسى سەرپىلىس. ءبىز بۇعان قول جەتكىزە الدىق»، - دەدى ن. نازاربايەۆ.

اۆتور: مارلان جيەمباي