قازىرگى ۇكىمەتكە جۇكتەلگەن ءىستى اياعىنا دەيىن جەتكىزۋگە مۇمكىندىك بەرۋ قاجەت - ەلباسى

استانا. قازاقپارات - ق ر پرەزيدەنتى نۇرسۇلتان نازاربايەۆ ۇكىمەتتى اۋىستىرۋدىڭ قاجەتتىگى تۋىنداپ وتىرماعانىن ايتتى. بۇل تۋرالى مەملەكەت باسشىسى داۋىس بەرۋ راسىمىنەن كەيىن تىلشىلەرگە بەرگەن سۇحباتىندا ءمالىم ەتتى.

«ەگەر پرەزيدەنتتىڭ جەكە پىكىرىن بىلگىلەرىڭىز كەلسە، وندا ۇكىمەت وتكەن جىلى پرەزيدەنتتىك سايلاۋدان كەيىن اۋىسقانىن ەسكە سالىپ وتكىم كەلەدى. بۇل كونستيتۋتسيا بويىنشا جاسالدى. ۇكىمەتتىڭ بۇگىنگى قۇرامى بۇگىندە جۇمىس ىستەپ جاتقان زاڭدار مەن باعدارلامالاردى ازىرلەدى. بۇل تۇرعىدا داعدارىسقا قارسى باعدارلامالار، بەس ينستيتۋتسيونالدى رەفورما قامتىلعان. مەنىڭ ويىمشا، ۇكىمەت قۇرامى - وتە ساۋاتتى ىرىكتەلىندى، ونىڭ مۇشەلەرى ءبىلىمدى، جاس، بىرنەشە ءتىلدى مەڭگەرگەن ءوز ىستەرىنىڭ بىلىكتى ماماندارى. وسى ورايدا ولارعا وزدەرىنە جۇكتەلگەن ءىستى اياعىنا دەيىن جەتكىزۋگە مۇمكىندىك بەرۋ قاجەت دەپ سانايمىن» ، - دەدى پرەزيدەنت.

سونىمەن قاتار مەملەكەت باسشىسى ۇكىمەت قۇرامىن پارلامەنت قالىپتاستىراتىنىن ەسكە سالىپ ءوتتى. بۇل رەتتە پارلامەنت ۇكىمەتكە سەنىم ءبىلدىرۋى ءتيىس. «ەگەر پرەمەر- مينيسترگە سەنىم جاسالسا، ۇكىمەت جۇمىسىن جالعاستىرادى. ال سەنىم بىلدىرمەسە، وندا ۇكىمەت تاراتىلادى. بۇعان پارلامەنت دەپۋتاتتارى تولىق قۇقىلى» ، - دەدى مەملەكەت باسشىسى.

 

 اۆتور: رۋسلان عابباسوۆ