ستاليننىڭ تۋفليى نەمەسە شۇلىقسىز ەينشتەين

 استانا. قازاقپارات - بۇگىنگى اڭگىمەمىز -  تاريحتاعى تانىمال تۇلعالاردىڭ ەرەكشە ادەتتەرى جايلى.

فرانسۋز قولباسشىسى ناپولەون بوناپارت وتە تەز تاماقتاناتىن بولعان. قولباسشى ءبىر ۋاقىتتا سورپادان دا، قويۋ تاماقتان دا، دەسەرتتەن دە ءدام تاتىپ، ون مينۋت وتپەي- اق ۇستەل باسىنان تۇرىپ كەتەدى ەكەن. ءبىر قىزىعى، ول ۇنەمى جالعىز تاماقتانعاندى ۇناتىپتى.

ال سۋرەتشى سالۆادور ءداليدىڭ ادەتى تىپتەن قىزىق. ول تۇستەنىپ بولعان سوڭ ورىندىققا وتىرعان كۇيى بەس- ون مينۋتتاي كوز شىرىمىن الۋدى ادەتكە اينالدىرىپتى. ۇيىقتار الدىندا سول قولىنىڭ سۇق ساۋساعىنا جەزدەن جاسالعان كىلتتى ءىلىپ، اياق جاعىنا تەمىر توستاعاندى قوياتىن بولعان. كوزى ءىلىنىپ بارا جاتقاندا قولىنداعى كىلتى توستاعانعا ءتۇسىپ، سونىڭ داۋىسىنان ويانادى ەكەن. داليدىڭ ايتۋىنشا، مۇنداي بەس- ون مينۋتتىق ۇيقى ادامدى تەز سەرگىتىپ، شابىتتاندىراتىن كورىنەدى.

ەينشتەيننىڭ ەشقاشان شۇلىق كيمەگەنىن بىلەتىن بە ەدىڭىز؟ ۇلى عالىم شۇلىقتى تۇك قاجەتسىنبەپتى. وسىنى جاسىرۋ ءۇشىن سالتاناتتى جيىندارعا ادەيى قونىشى ۇزىن ەتىكتەرمەن بارعان ەكەن.

فرانسۋز جازۋشىسى ونورە دە بالزاك ءوز شىعارمالارىن تەك تۇندە جازعان. سوندىقتان كوفەنى تىم كوپ ىشكەن. بالزاكتىڭ قولجازبالارىنداعى كوفەنىڭ ىزدەرى - سونىڭ ايعاعى بولسا كەرەك. كوفەنىڭ اسەرىنەن ول تاپجىلماي 48 ساعات بويى جۇمىس ىستەگەن. اقىرى بۇل ادەتى جازۋشىنىڭ تۇبىنە جەتكەن.

ساياساتكەر ستالين تىم قاراپايىم كيىنىپتى. ول ءبىر كيىمدى شەشپەستەن ۇزاق ۋاقىت بويى جۇرە بەرگەن ەكەن. قايراتكەردىڭ وققاعارى بولعان الەكسەي رىبين بىلاي جازعان: «ونىڭ ءبىر عانا تۋفليى بولدى. اياق كيىمنىڭ تەرىسى جالبىراپ، وكشەسى جەلىنىپ قالعان. ستالين مۇنىمەن جۇمىستا دا، تەاتردا دا، ەل الدىندا دا ەش قىسىلماي جۇرە بەردى. بىردە وعان جاڭا تۋفلي ساتىپ الىپ، كەرەۋەتىنىڭ تۇبىنە قويدىق تا، ەسكىسىن الىپ كەتتىك» . الايدا، ولاردىڭ ويى ىسكە اسپاپتى. ۇيقىدان ويانعان ستالين ءوزىنىڭ بۇرىنعى تۋفليىن تەز ارادا قايتا اكەلىپ بەرۋلەرىن بۇيىرىپ، اشۋلانعان ەكەن.

 

«استانا اقشامى»