قازاقستان ازاماتتارى رەسەيدىڭ بەس قالاسىندا داۋىس بەرۋدە

استانا. قازاقپارات - قازاقستان پارلامەنتىنىڭ تومەنگى پالاتاسىنا دەپۋتاتتاردى سايلاۋ كۇنىندە داۋىس بەرۋ ماسكەۋ، سانكت-پەتەربۋرگ، قازان، استارحان، ومبى قالالارىندا وتۋدە.

ر ف اۋماعىندا تۇراتىن نەمەسە ۋاقىتشا تۇراتىن قازاقستان ازاماتتارى داۋىس بەرەتىن سايلاۋ ۋچاسكەلەرى ر ف بەس قالاسىندا اشىلدى.

پارتيالىق ءتىزىم بويىنشا سايلاناتىن دەپۋتاتتاردى كەزەكتەن تىس سايلاۋ جەكسەنبى كۇنى وتۋدە.

ر ف- داعى رەسپۋبليكا ەلشىلىگىنىڭ بۇدان بۇرىنعى حابارلاماسىندا ايتىلعانداي، سايلاۋ كۇنى داۋىس بەرۋ جەرگىلىكتى ۋاقىت 07.00 دەن باستاپ 20.00 گە دەيىن ماسكەۋ، سانكت-پەتەربۋرگ، قازان، استارحان، ومبى قالالارىندا وتەدى.

بۇدان بۇرىن قازاقستاندىق پارلامەنتشىلەر مەرزىمىنەن بۇرىن سايلاۋ وتكىزۋگە باستاما كوتەرگەن بولاتىن. دەپۋتاتتار مۇنى جاھاندىق جۇيەلى داعدارىس كەزەڭىندە شۇعىل ارەكەتتەر قابىلداۋ قاجەتتىلىگىمەن ءتۇسىندىردى. ولاردىڭ ايتۋىنشا، مەرزىمىنەن بۇرىن وتكىزىلگەن سايلاۋ جاڭا رەفورمالاردى ىسكە اسىرۋعا دەرەۋ كىرىسۋگە جانە قازاقستانداعى داعدارىسقا قارسى شارالاردى ءتيىمدى ىسكە اسىرۋعا مۇمكىندىك بەرەدى.

قازاقستان پارلامەنتىنىڭ تومەنگى پالاتاسىندا -107 دەپۋتات. ولاردىڭ 98 ءى پارتيالىق ءتىزىم بويىنشا ءبىرىڭعاي جالپى ۇلتتىق سايلاۋ وكرۋگى بويىنشا سايلانادى. قالعان 9 مانداتتى قازاقستان حالقى اسسامبلەياسى (ەلدىڭ بارلىق ەتنوستارىنىڭ مۇددەلەرىن بىلدىرەتىن قازاقستان پرەزيدەنتى جانىنداعى كونسۋلتاتيۆتىك- كەڭەسشى ورگان) سايلايدى. ق ح ا- دان دەپۋتاتتار سايلاۋ 21- ناۋرىزعا تاعايىندالدى.

پارلامەنتتەگى ورىندارعا التى پارتيا تالاسقا تۇسەدى - «نۇر وتان» پارتياسى (127 ۇمىتكەر)، «اقجول» پارتياسى (35 ۇمىتكەر)، «اۋىل» (19 ۇمىتكەر)، قازاقستان كوممۋنيستىك حالىقتىق پارتياسى (22 ۇمىتكەر)، جالپى ۇلتتىق سوتسيال-دەموكراتيالىق پارتيا (23 ۇمىتكەر) «بىرلىك» پارتياسى (سەگىز ۇمىتكەر).