ن. نازاربايەۆ ق ر پارلامەنتى ءماجىلىسى جانە ەلوردا ءماسليحاتى دەپۋتاتتارى سايلاۋىندا داۋىس بەردى

استانا. قازاقپارات - ق ر پرەزيدەنتى نۇرسۇلتان نازاربايەۆ ق ر پارلامەنتى ءماجىلىسى جانە ەلوردا ءماسليحاتى دەپۋتاتتارى سايلاۋىندا داۋىس بەردى.

اتاپ ايتقاندا، مەملەكەت باسشىسى ەلورداداعى وقۋشىلار سارايىندا ورنالاسقان 81№ سايلاۋ ۋچاسكەسىنە كەلىپ، تاڭداۋ جاسادى.

بۇدان بۇرىن حابارلانعانداي، جەرگىلىكتى ۋاقىت بويىنشا تاڭعى ساعات 7.00 دەن كەشكى ساعات 20.00 گە دەيىن 9840 سايلاۋ ۋچاسكەسىندە داۋىس بەرۋ وتەدى، مۇنان بولەك شەتەلدە 65 سايلاۋ ۋچاسكەسى جۇمىس ىستەيدى. جالپى، 9791165 قازاقستاندىق داۋىس بەرۋشىلەر تىزىمىنە ەنگىزىلگەن.

ايتا كەتەيىك، ساياسي دوداعا بارلىعى التى پارتيا - «نۇر وتان» پارتياسى، قازاقستاننىڭ «اق جول» دەموكراتيالىق پارتياسى، «اۋىل» حالىقتىق-دەموكراتيالىق پاتريوتتىق پارتياسى، قازاقستان كوممۋنيستىك حالىق پارتياسى، جالپى ۇلتتىق سوتسيال-دەموكراتيالىق پارتياسى جانە «بىرلىك» ساياسي پارتياسى قاتىسىپ جاتىر.

پارتيالىق تىزىمدەر بويىنشا سايلاناتىن پارلامەنت ءماجىلىسىنىڭ 98 دەپۋتاتى، سونداي-اق وبلىستىق، استانا، الماتى قالالىق ءماسليحاتتارىنىڭ 550 دەپۋتاتى، قالالىق ءماسليحاتتاردىڭ 625 دەپۋتاتى جانە اۋداندىق ءماسليحاتتاردىڭ 2160 دەپۋتاتى سايلانادى.

اۆتور: رۋسلان عابباسوۆ