تاۋ-كەن كومپانياسىنىڭ بۇرىنعى باسشىسىنىڭ ۇشاعى تۇرعىن ءۇيدىڭ ۇستىنە قۇلادى

استانا. قازاقپارات - سان-پاۋلۋدا تۇرعىن ءۇي ورامىنا جەڭىل موتورلى ۇشاق قۇلاپ، ونىڭ سالدارىنان جەتى ادام اجال قۇشتى، دەپ حابارلادى ر ب ك.

ۇلتتىق ازاماتتىق اۆياتسيا اگەنتتىگىنىڭ دەرەكتەرىنە سۇيەنسەك، قۇلاعان ۇشاق Vale كومپانياسىنىڭ بۇرىنعى پرەزيدەنتى رودجەر اگنەلليگە تيەسىلى، دەپ اتاپ ءوتتى Reuters اگەنتتىگى. اگنەللي بورتتا بولدى ما، جوق پا، ول جاعى ازىرگە بەلگىسىز.

مەملەكەتتىك اۆياتسيالىق ينفراقۇرىلىم اگەنتتىگىنىڭ دەرەكتەرىنە سايكەس وقيعا سەنبى كۇنى، 19- ناۋرىزدا، ساعات 15:20 شاماسىندا ورىن العان. ۇشاق سان-پاۋلۋداعى كامپو دە مارتە اۋەجايىنان اۋاعا كوتەرىلە بەرە، بىردەن قۇلاعان.

وقيعا سالدارىنان ۇشقىش، ۇشاقتىڭ التى جولاۋشىسى قازا تاپتى، دەدى جەرگىلىكتى ءورت ءسوندىرۋ ءبولىمىنىڭ وكىلى. ۇشاق قۇلاعان عيماراتتا ءبىر ادام جاراقات الدى.

Globo باسىلىمىنىڭ دەرەكتەرىنە سۇيەنسەك، اگنەللي بورتتا بولىپ، اپات سالدارىنان قازا تاپقان. بورتتا سونداي-اق بيزنەسمەننىڭ جۇبايى، ەكى بالاسى - قىزى مەن ۇلى - جانە ولاردىڭ جۇبايلارى بولعان.

اگنەللي Vale كومپانياسىن 2011-جىلعا دەيىن ون جىلداي باسقارعان.