پرەزيدەنت كۇزەتشىلەرىنە ۇستاتپاي نازاربايەۆتىڭ الدىنا جۇگىرىپ بارعان ءبۇلدىرشىن قىز قالاي ءۇي العانىن ايتىپ بەردى - فوتو
وقيعا 2005 -جىلدىڭ 6 - مامىرىندا بولدى. جۇمىس ساپارىمەن اقتوبەگە كەلگەن ەلباسىن وبلىستىق اكىمدىك الدىندا بىرنەشە مىڭداعان حالىق كۇتتى. سول كەزدە حالىق اراسىنان جۇگىرىپ شىققان شولپان ەسىمدى قىز بالا نازاربايەۆتىڭ الدىنا قالاي جەتكەنىن ارنايى NUR. KZ پورتالىنا ايتىپ بەردى.
«ۇيدەن شىعىپ، انام پرەزيدەنتتىڭ الدىنان كۇتىپ الامىز دەگەندە مەندە قورقىنىش بولعان جوق. ال حالىق جينالعان جەرگە بارعان كەزدە پوليتسيا قىزمەتكەرلەرى «مىنا سىزىقتان شىقساڭدار اتامىز!» دەگەندە قورقىپ كەتتىم. « ءارى تۇرىڭدار، قوزعالساڭدار اتامىز!» دەگەن سايىن قورقام، ءبىراق انامنىڭ «ەشكىم تيمەيدى، تەك جۇگىرىپ بارىپ حاتتى بەرىپ ۇلگەر» دەگەن ءسوزى قۇلاعىمدا ايقايلاپ تۇردى. انام «قورىقپا، قاسىڭدا مەن بارمىن» دەپ سابىرعا شاقىردى» ، - دەيدى شولپان بيمىرزايەۆا.
سول كەزدە 13 جاستا بولعان شولپان قازىر 23 جاستا. ول ومىرىندە بولعان بۇل وقيعانى ۇمىتىلماس تاريحي جاعدايعا تەڭەيدى. پرەزيدەنت كولىكتەن تۇسكەننەن كەيىن ءۇش قادام باستىرماي قاسىنا جەتىپ بارعان.
«وبلىستىق اكىمدىك الدىندا كۇندىزگى ساعات 13:00 دەن كەشكى 17:00 گە دەيىن ءبىر ورىندا قوزعالماي تۇردىق. ءبىر كەزدە ول كىسى كەلدى. ماشينادان تۇسكەننەن كەيىن ءۇش قادام جاساعان بولۋ كەرەك انام «جۇگىر!» دەپ يتەرىپ جىبەردى. قالاي جۇگىرىپ بارعانىم ەسىمدە جوق. ادامداردى قورشاپ تۇرعان پوليتسيا قىزمەتكەرلەرى مەنىڭ جۇگىرگەنىمدى كورگەن جوق. ال پرەزيدەنتتىڭ ءوز كۇزەتشىلەرى مەنى ۇستاپ ۇلگەرە الماي قالدى. مەنى ەلباسىمىزدىڭ ءوزى ۇستادى، ەكپىنىمدى قولىمەن توقتاتتى. كۇزەتشىلەر مەن ەلباسىنىڭ الدىندا تۇرعان كەزدە عانا ەستەرىن جيدى، ءبىراق ول كەزدە ولار ءۇشىن ءبارى كەش بولاتىن. مەنىڭ قولىم دا، حاتىم دا نۇرسۇلتان اعانىڭ الاقانىندا تۇردى. پرەزيدەنتىمىز قولىنا حاتتى الىپ «حات قايدان دەدى؟ » دەدى. «كوپ بالالى انا ۇلدامەت الپىسبايەۆا سىزدەن ءۇي سۇرايدى» دەپ انام ۇيرەتكەن، جاتتاپ العان ءسوزىمدى ايتتىم. ول كىسى مەنىڭ ماڭدايىمنان سىيپاپ، ارقامنان قاقتى دا «ورىندالادى!» دەدى. سودان كەيىن مەن ورنىما بارعاننان كەيىن عانا ەسىمدى جيدىم» ، - دەيدى شولپان بيمىرزايەۆا.
جۇگىرە شاپقان كىشكەنتاي قىزدى قالت جىبەرىپ العان قاۋىپسىزدىكتى ساقتاۋ قىزمەتكەرلەرى ول ورنىنا ورالعان كەزدە عانا ەستەرىن جيىپ، تەرگەۋگە العان.
«مەن انامنىڭ قاسىنا كەلگەن كەزدە بارلىق پوليتسيا، پروكۋراتۋرا قىزمەتكەرلەرى ءبىزدى قورشاپ الدى. «كىمسىڭدەر، نە جاسادىڭدار، نە بەردىڭدەر، ىشىندە جارىلعىش زات بار ما؟ نە بار؟ » دەپ سول جەردەن انام ەكەۋمىزدى پروكۋراتۋراعا الىپ كەتتى. ولاردىڭ سۇراقتارىنا مامام جاۋاپ بەرىپ وتىردى. «نە جازدىڭىز، ىشىندە نە بار؟ ءسىز قازاقستان ەلىنىڭ ازاماتىسىز با؟ » دەپ سۇراپ جاتتى. كەيىن ءبىزدىڭ تۇرىپ جاتقان جەرىمىزگە ەرتىپ الىپ كەلدى. ءبىز حاتتى مامىر ايىنىڭ 6- كۇنى بەرسەك، ءبىر ايدان كەيىن شىلدەنىڭ 20 سىندا ءۇي الدىق» ، - دەيدى شولپان.
قۇتتى ۇيدە ون جىل تۇرعان شولپان قازىر ءۇش ايدان بەرى شىمكەنت قالاسىنىڭ كەلىنى بولىپ وتىرعانىن ايتتى. ال ونىڭ اتا- اناسى «نازاربايەۆ بىزگە كومەكتەسۋ ءۇشىن اللانىڭ جىبەرگەن سەبەپشى ادامى» دەيدى. ادام ەمدەۋمەن اينالىساتىن ەرلى- زايىپتىلارعا اتالارى حات جازۋ تۋرالى ايان بەرگەن.
«اقتوبەگە 1996 -جىلدارى كوشىپ كەلىپ، پاتەر جاعالاپ جۇردىك. 2001 -جىلى ءبىر كىشكەنتاي جەرتولە ساتىپ الىپ، سوندا تۇردىق. ءبىر كۇنى بىزگە ايان بەردى. جولداسىم ءتۇس كوردى. مەن ءبىر كۇندە ايانمەن ولەڭدەتىپ حات جازدىم. كۇتۋگە بارعان ءبىزدى قانشاما كۇزەت جولاتقان جوق. «پرەزيدەنتتىڭ اق قاعازداي بەتىن كورىپ قالعىم كەلەدى» دەپ الدىعا قاراي تۇرۋعا تىرىستىم. كۇزەتىپ تۇرعاندار «بەتىن نە قىلايىن دەپ ەدىڭ» دەپ ۇرسىپ جاتىر. ەلباسىن كۇتىپ تۇرعان كەزدە بەلگىسىز كۇش قولىممەن قىزىمدى يتەرتىپ جىبەردى. ءارۋاقتار «ءبارىنىڭ كوزى بايلاۋلى، قىزىڭ اڭدۋلى كوزدەردەن تاسادا بولادى جىبەر» دەدى. قۇدىرەتكە ەشكىم سەنبەيدى. ءبىراق بىرنەشە قاتار بولىپ تۇرعان كۇزەت اراسىنان قىزىمنىڭ ءوتىپ كەتكەنى، اللانىڭ قالاۋى ەدى. قىزىمنىڭ نازاربايەۆتىڭ الدىندا تۇرعانىن كورگەن كەزدە قولىمدى كوتەرىپ بيلەپ كەتتىم. قىزىم قاسىما كەلگەن كەزدە ەكەۋمىزدى ماشيناعا تيەپ الدى. پروكۋراتۋراعا اپارىپ، تۇسىنىكتەمە جازعىزدى»، - دەيدى شولپاننىڭ اناسى ۇلدامەت الپىسبايەۆا.
قىز بەن شەشەسىن ەلباسىنا بەرىلگەن حاتتان كەيىن تەرگەۋشىلەر ءبىراز اۋرەگە سالعان.
«تەرگەۋشىلەر حاتتا نە جازعانىڭدى جاز دەپ دىكەڭدەدى. مەن ونى قايدان جازام سول كەزدە ارقامەن ءارۋاقتاردىڭ كۇشىمەن جازىلعان حاتتى سول كۇيى جازا المايتىنىمدى ايتتىم»،- دەپ ءسوزىن قورىتىندىلادى شولپاننىڭ اناسى.
