وتەشوۆ پەن قىدىرباەۆتان تابىلعان دوپينگتىڭ كۇشى قانداي؟

استانا. قازاقپارات - اۋىر اتلەتيكادان حيۋستونداعى الەم چەمپيوناتىندا كۇمىس جانە قولا مەدال العان الماس وتەشوۆ پەن جاسۇلان قىدىربايەۆ «دوپينگ پايدالاندى» دەپ ايىپتالعانى بارشامىزعا ءمالىم.

دەگەنمەن حالىقارالىق اۋىر اتلەتيكا فەدەراتسياسى بۇل سپورتشىلار تۋرالى ناقتى شەشىمدى ءالى جاريالاعان جوق.

ەستەرىڭىزدە بولسا، «دوپينگ داۋى» تۋرالى IWF- نىڭ رەسمي سايتى جاريالاعان ەدى. وتەشوۆ پەن قىدىربايەۆتان بولەك ەرمەك ءومىرتايدىڭ دا قانىنان رۇقسات ەتىلمەگەن پرەپاراتتىڭ ءىزى تابىلعان.

العاشقى تەكسەرىستەن كەيىن سپورتشىلاردىڭ قانىنان Chlorodehydromethyltestosterone (حلورودەگيدرومەزۋلتەستوستەرون) پرەپاراتىنىڭ تابىلعانى ءمالىم بولدى.

بۇل پرەپارات العاش رەت 1960-جىلدارى گەرمانياداعى «Jenapharm» فارماتسيەۆتيكالىق فابريكاسىندا جاسالا باستاعان. ودان كەيىن بۇل پرەپاراتتى 1968-جىلى مەكسيكادا وتكەن وليمپيادا ويىندارىندا كاسىبي سپورتشىلار كۇش قولداناتىن سپورت تۇرلەرىنە (يادرو لاقتىرۋ، سپرينت جارىسى، ءجۇزۋ جانە اۋىر اتلەتيكا) كەڭىنەن پايدالانعان ەدى. 1970-1980-جىلدارى بۇل پرەپاراتتى كاسىبي سپورتشىلاردىڭ پايدالانۋى جيىلەي باستادى. پرەپارات 1974-جىلى گەرمانياداعى ارنايى زەرتحانادا 13 جاستاعى بالاعا جاسىرىن تۇردە سىناقتان وتكىزىلگەن. كەيىنىرەك 1994-جىلى «Jenapharm» فابريكاسى بىرنەشە سىناقتاردىڭ ناتيجەسىن قورىتىندىلاي كەلە بۇل پرەپاراتتىڭ ادام اعزاسىنا زيان ەكەنىن انىقتاپ، اشىق تۇردە قولدانۋعا تيىم سالعان ەدى.

پرەپاراتتىڭ اسەرى

پرەپاراتتى قولدانعاننان كەيىن ادام اعزاسى ۇزاق ۋاقىتقا دەيىن بەلسەندى تۇردە جۇمىس جاسايدى. اس قورىتۋ پروتسەسسى جىلدام جۇمىس جاساپ، سالماق قوسۋعا مۇمكىندىك بەرەدى. پرەپاراتتىڭ نەگىزگى اسەرى بۇلشىق ەتتىڭ جىلدام جەتىلۋىنە اسەر ەتىپ، ارتىق كۇش الۋعا مۇمكىندىك بەرەدى. بۇل پرەپاراتتى قولدانعاننان كەيىن ادامنىڭ بۋىندارى تەز قاتايىپ، سۇيەكتىڭ مايىسىپ كەتۋىنىڭ الدىن الادى. ودان بولەك، پرەپارات اسەرىنەن ادام ءوز اياعىن جەڭىل سەزىنىپ، جىلدام كۇش الۋعا بەيىم بولادى. بۇل كوبىنەسە جەڭىل اتلەتيكاداعى ۇزاق قاشىقتىققا جۇگىرەتىن سپورتشىلار ءۇشىن ءتيىمدى.

كەرى اسەرى

ايەل ادام بۇل پرەپاراتتى كوپ قولدانسا ونىڭ گورمونيالىق جەتىلۋى ەر ادام تارىزدەس وزگەرەدى، داۋىسى جۋانداي باستايدى جانە ءزار شىعارۋى پروتسەسسى وزگەرەدى. ەر ادامدى بەدەۋلىككە الىپ كەلەدى جانە ىشكى بەزدەردىڭ كوبەيۋىنە اسەر ەتەدى. بۇل پرەپاراتتى جاس بالالاردىڭ قولدانۋىنا قاتاڭ تيىم سالىنعان. سەبەبى بارلىق سىناقتىڭ ناتيجەسى بويدىڭ ءوسۋىن توقتاتاتىنىن كورسەتكەن.

ەستەرىڭىزگە سالا كەتەيىك، بۇل پرەپارات WADA شەشىمىمەن قولدانۋعا تىيىم سالىنعان.

«الامان»