قازاق ارۋى بايقاۋىنان كەيىن باعى جانعان سۇلۋلار - فوتو
ءبىرى تەلەباعدارلامالاردان بوي كورسەتسە، ەندى ءبىرى ەسەنتايپروداكشن فيلمىنە تۇسەدى. بۇدان وزگە ولاردىڭ اراسىندا ءوز جولىن تاۋىپ، قالاعان ىسىمەن اينالىسقان جاندار دا جوق ەمەس.
«قىز وسسە - ەلدىڭ كوركى» دەپ بابالارىمىز ايتقان ونەگەلى ءسوزدىڭ استارىندا حالقىمىزدىڭ قىز بالاسىن سۇلۋلىق پەن نازىكتىككە بالايتىنىن بايقاۋعا بولادى. قىز بالاسى قاشان دا اسەمدىكتىڭ نىشانى بولعان. مۇنى بەلگىلى پروديۋسەر دە ەسكەرگەن-دى.
بايان ەسەنتايەۆانىڭ باستاماسىمەن وسىمەن التىنشى جىل قاتارىنان ۇيىمداستىرىلىپ وتىرعان «قازاق ارۋى» بايقاۋىنا سىرتقى كەلبەتى مەن اقىلى ۇيلەسكەن سۇلۋ قىزدار قاتىستى. ولاردىڭ ءارقايسىسى - اقىل مەن تاربيەنى بويىنا قاتار ءسىڭىرىپ، حالقىمىزدىڭ قۇندىلىقتارىن ارداقتاي بىلگەن سۇلۋلار.
ەستەرىڭىزگە سالا كەتسەك، 2011 -جىلى ءلاززات قالدىبەكوۆا، 2012 -جىلى ايعانىم وتەپبەرگەنوۆا، 2013 -جىلى ايگەرىم قاناتبايەۆا، 2014 -جىلى گۇلناز جولانوۆا «قازاق ارۋى» بايقاۋىنىڭ جەڭىمپازى اتانعان ەدى. بىلتىر ءتاج قوسكەلوۆا كامشات بەرگەن قىزىنا بۇيىرسا، بيىل «قازاق ارۋى» دەگەن اتقا ءالميرا احاتوۆا لايىق بولدى.
ءلاززات قالدىبەكوۆا قازاقستاننىڭ ءار قالاسىنان جينالعان 500 گە تارتا بويجەتكەندەردىڭ ىشىنەن سۋىرىلىپ، «قازاق ارۋى-2011» بايقاۋىنىڭ جەڭىمپازى اتانعان بولاتىن. ول بايقاۋعا قاتىسپاس بۇرىن حالىقارالىق «بوزتورعاي» فەستيۆالىنىڭ جۇلدەگەرى، «تەاتر كوكتەمى-2010» فەستيۆالىنىڭ «تۇساۋ كەسەر» نوميناتسياسىنىڭ يەگەرى اتانىپ ۇلگەرگەن ەكەن. ءلاززات قالدىبەكوۆا 2007 -جىلى مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنا قابىلدانعان. مۇحتار اۋەزوۆتىڭ «ابايىندا» ماعىش، تىنىمباي نۇرماعانبەتوۆتىڭ «قوجاناسىر ءتىرى ەكەنىندە» زۇلەيحا، دۋلات يسابەكوۆتىڭ «جاۋجۇرەگىندە» عاليا، يسرايل ساپاربايدىڭ «قىز مۇڭىندا» ساعىنىش، گوگولدىڭ «ۇيلەنۋىندە» اگافيا تيحونوۆنا، مامەسەيىتتىڭ «باكەي قىزىندا» باكە، سارسەكەنىڭ «تەندەرگە تۇسكەن كەلىنشەگىندە» كەزبە، عايىپتىڭ «مەن ىشپەگەن ۋ بار ما؟...» قويىلىمىندا نۇرعانىم، ورازاليننىڭ «شىراق جانعان تۇنىندە» نۇرگۇل سىندى كەيىپكەرلەردى سومدايدى. قازىر دە اتالعان تەاتردىڭ اكتريساسى.
ال 2011 -جىلى ساق ۇلگىسىندە كومكەرىلگەن كۇمىس ءتاج، گاۋھار تاستى القا مەن تەلەارنالاردىڭ بىرىندە باعدارلاما جۇرگىزۋ مۇمكىندىگىن الماتىلىق سۇلۋ ايعانىم وتەپبەرگەنوۆا يەلەنگەن بولاتىن. قازاق ارۋى ءوزىنىڭ جەڭىسىن اتا- اناسىنا ارنايتىندىعىن، ولار بولماسا، بۇنداي باقىتقا بولەنە المايتىندىعىن ايتقان ەدى. ايعانىم وتەپبەرگەنوۆا تۇرمىسقا شىعىپ، حالىق كوزىنەن تاسا بولعان- دى. الايدا ارۋ ۋاقىتتى بوس وتكىزبەي پروديۋسەرلىكپەن اينالىسقان. مۇنىمەن قاتار، «ەيفوريا» شوۋ- بالەتىنە جەتەكشىلىك ەتىپ، الداعى ۋاقىتتا جەكە بيزنەسىن باستاۋدى جوسپارلاپ وتىر. ال بيزنەس ءتۇرىنىڭ قانداي بولاتىندىعى ازىرگە قۇپيا.
ايگەرىم قاناتبەك - قىزىلوردا مەملەكەتتىك ۋنيۆەرسيتەتىنىڭ تۇلەگى. ەكونوميكا فاكۋلتەتىندە ءبىلىم العان. ول ساحناعا جۇرگىزۋشى رەتىندە شىعىپ، ءتۇرلى سۇلۋلىق سايىسىنا قاتىسقان. سۇيكىمدى قىزدى ءبىرىنشى كۋرستا وقىپ جۇرگەن كەزىندە- اق مەرەكەلىك كەشتەردى جۇرگىزۋگە شاقىرادى. 2010 -جىلدىڭ قاڭتار ايىندا « قىزىلوردانىڭ جاڭاجىلدىق ارۋى» اتاعىن جەڭىپ الادى. 2010 -جىلدىڭ ناۋرىز ايىندا قالالىق ءمادينا ەراليەۆا اتىنداعى مادەنيەت ۇيىندە وتكەن «اقمەشىت ارۋى-2011» سايىسىندا باس جۇلدەنى يەلەنەدى. بوس ۋاقىتىندا ءان ايتادى. «مەن ۋنيۆەرسيتەتتى ءتامامداعان سوڭ ماماندىعىما قاتىستى مەملەكەتتىك مەكەمەدە جۇمىس ىستەيمىن. ونەرگە جاقىن بولعاندىقتان، ەسترادالىق اندەر شىرقايتىن بولامىن»، - دەپ وزىندىك جوسپارلارىمەن دە بولىسكەن- ءدى.
2014 -جىلى ەلدىڭ ەڭ ادەمى ارۋى اتاعى ءۇشىن 21 ۇمىتكەر سىنعا ءتۇستى. ناتيجەسىندە ماڭعىستاۋ وبلىسىنىڭ اتىنان بارعان گۇلناز جولانوۆا جەڭىمپاز اتاندى. نەبارى 20 جاستاعى ارۋ - اقتاۋداعى ەكونوميكالىق ليتسەيدىڭ تۇلەگى. گۇلناز جولانوۆا «ماحابباتىم جۇرەگىمدە» تەلەحيكاياسىندا باستى ءرولدى سومدادى. بۇدان وزگە «17+» تەلەحيكاياسىنا ءتۇسىپ، كورەرمەندەر كوزايىمىنا اينالدى. گۇلناز: «شىنىمدى ايتسام، كامەراعا كوپ قاتىسى جوق ادامعا بەرىلگەن وبرازدى سومداۋ قيىنعا سوعادى ەكەن. سىن تۇزەلمەي، ءمىن تۇزەلمەيدى دەمەكشى، ءوزىمنىڭ قاتەلەرىمدى دە بايقايمىن»، - دەپ سۇحباتتارىنىڭ بىرىندە اعىنان جارىلدى.
«قازاق ارۋى-2015» بايقاۋىنىڭ فينالى استانادا ءوتتى. 21 جاستاعى كامشات قوسكەلوۆا جەڭىمپاز اتاندى. كامشات وسى كۇندە گۋميليەۆ اتىنداعى ەۋرازيالىق ۋنيۆەرسيتەتىن ءتامامدادى. ەكونوميكا فاكۋلتەتىندە تۋريزم ماماندىعىندا وقىعان بولاتىن. مۇنىمەن قاتار، «استانا وپەرا» تەاترىنىڭ باستى زالىندا ادمينيستراتور بولىپ قىزمەت جاساعان.
بايان ەسەنتايەۆانىڭ ايتۋىنشا، جەڭىمپاز قازىلار القاسىن ءوزىنىڭ اسەمدىگىمەن جاۋلاپ العان ەكەن. ول تۋرالى بايان ەسەنتايەۆا: «ءبىز جەڭىمپازدى تاڭداعان كەزدە تالانت، سۇلۋلىق، اقىل سىندى قاسيەتتەردى ۇشتاستىرۋعا تىرىسامىز. ال كامشات مونولوگى ارقىلى ءوزىن تاماشا قىرىنان كورسەتتى»، - دەيدى. ءدال قازىر «قازاق ارۋى - 2015» كامشات قوسكەلوۆا ءوزىن بىرنەشە باعدارلامالاردا جۇرگىزۋشى قىرىنان جانە ميۋزيكلدە اكتريسا رەتىندە كورىنىپ جۇرگەن ارۋ.
بيىل التىن ءتاج بۇيىرعان اقىلىنا كوركى ساي بويجەتكەن اتىراۋ قالاسىنىڭ تۋماسى. مەديتسينا ۋنيۆەرسيتەتىنىڭ 3-كۋرس ستۋدەنتى. «باستاپقىدا 600 ارۋدىڭ، كەيىن 21 ارۋدىڭ ىشىنەن سۋىرىلىپ شىعۋ ماعان وڭاي بولمادى. ويتكەنى وسىندا تۇرعان ءاربىر ارۋ جەڭىسكە ابدەن لايىق. تۇيسىگىم جەڭەتىنىمدى سەزدىرسە دە، ىشتەي كۇمانداندىم. ءبىراق قالاۋىم كۇشتى بولىپ، قازىر جەڭىسىمە شەكسىز قۋانىپ وتىرمىن»، - دەدى بويجەتكەن جۋرناليستەرگە بەرگەن سۇحباتىندا.
ەلىمىزدىڭ ەڭ سۇلۋ ارۋلارىن بولاشاقتا ءتۇرلى سالادان كورۋىمىز مۇمكىن ەكەنى ءسوزسىز.
ەستەرىڭىزدە بولسا، وسى ۋاقىتقا دەيىن «قازاق ارۋى-2016» بايقاۋىنىڭ جەڭىمپازى انىقتالعانى تۋرالى جازعان بولاتىنبىز.
